Монгол Улсын Ерөнхийлөгчийн өргөн барьсан УИХ-ын тухай хуульд нэмэлт, өөрчлөлт оруулах буюу “УИХ-ын гишүүнийг эгүүлэн татах” хуулийн төслийн талаархи хэлэлцүүлэг олон нийтийн дунд үргэлжилсээр байна.
Зарим судлаач, иргэд парламентын дархлаанд сөргөөр нөлөөлж болзошгүй гэж үзэж буй бол нөгөө хэсэг нь хариуцлагыг нэмэгдүүлэх чухал зохицуулалт хэмээн дэмжиж байна. Энэхүү маргаантай асуудлын хүрээнд дэлхийн улс орнуудад парламентын гишүүд гэмт хэрэг, авлига, ёс зүйн зөрчил, эсвэл улс төрийн хариуцлагын улмаас огцорсон, түдгэлзсэн, эсвэл эгүүлэн татагдсан жишээнүүдийг тоймлон хүргэж байна.
- Их Британи
Их Британийн парламентын гишүүн асан Оуэн Уильям Патерсон ёс зүйн зөрчилтэй холбоотой шалгалтын дараа 2021 онд огцорсон. Түүнийг цалинтай лоббид оролцсон гэж Ёс зүйн комисс дүгнэжээ. Мөн Дэвид Майкл Чайтор парламентын зардлын дуулиант хэрэгт холбогдож, худал тайлан гаргасан гэм буруугаа хүлээн зөвшөөрсний дараа шүүхээс хорих ял авч, улс төрийн карьераа дуусгасан байна.
- Франц
Францын Ерөнхий сайд асан Франсуа Фийон төсвийн хөрөнгийг буруу ашигласан хэрэгт холбогдож, шүүхээс хорих ял авсан. Мөн Патрик Балкан татвараас зайлсхийсэн хэргээр ял шийтгүүлж, хотын даргын албан тушаалаасаа чөлөөлөгдөж байжээ.
- Итали
Европын парламентын гишүүн асан Пьер Антонио Панзери авлига, мөнгө угаах хэрэгт холбогдон баривчлагдаж, мөрдөн байцаалтын явцад гэм буруугаа хүлээн зөвшөөрсөн байна. Мөн Антонио Раззи улс төрийн байр суурь, авлигын маргаантай холбоотой шүүмжлэлээс үүдэн дахин нэр дэвших эрхээ алдаж, улс төрийн идэвх нь буурсан юм.
- Дани
Данийн улс төрч Ингер Стойберг цагаач хүүхдүүдийг хүчээр тусгаарласан шийдвэртэй холбоотой хэргээр албан тушаалаа урвуулсан гэж үзэгдэн хорих ял авч, парламентын суудлаасаа чөлөөлөгджээ. Мөн Мортен Мессершмидт Европын холбооны хөрөнгө буруу ашигласан хэрэгт холбогдсон ч шүүхийн шат дамжлагаар эцэстээ цагаатгагдсан байна.
- Норвеги
Хадиа Тажик орон сууц ашиглалт болон татвартай холбоотой маргааны дараа сайдын албан тушаалаасаа огцорсон бол Анетт Треттбергстюэн төрийн байгууллагын томилгоотой холбоотой асуудлын дараа огцорчээ.
- Япон
Цүёши Такаги улс төрийн санхүүгийн дуулианд нэр холбогдсон бол Кацуюки Кавай сонгуулийн кампанит ажлын хууль зөрчсөнтэй холбоотой хэрэгт холбогдон огцорсон байна. Мөн Японы Ерөнхий сайд асан Какуэй Танака авлигын шинжтэй дуулианы дараа огцорч байв.
- БНСУ
Ли Сок-ки үндэсний аюулгүй байдалд заналхийлсэн хэргээр шүүхээс хорих ял авч, парламентын гишүүний эрхээ алдсан. Чо Күк хүүхдийн их сургуулийн элсэлтийн бичиг баримт хуурамчаар бүрдүүлсэн хэргээр ял авч, улс төрийн эрх нь хязгаарлагдсан бол Ким Нам-күк криптовалюттай холбоотой асуудлаар намын шийдвэрээр парламентаас хасагдсан байна.
- АНУ
Жорж Сантос Конгрессоос ёс зүйн болон эрүүгийн мөрдөн шалгалтын дараа хөөгдөж, хожим нь гэмт хэргээ хүлээсэн. Сенатор Боб Менендес авлигын хэрэгт буруутай гэж үзэгдэж, 2024 онд албан тушаалаасаа огцорсон байна.
- Герман
Аксел Фишер гадаадын ашиг сонирхолд үйлчилсэн авлигын хэрэгт буруутай гэж үзэгдэн шүүхээс хорих ял авсан.
- Финланд
Илкка Канерва ёс зүйн маргаантай холбоотой дуулианы дараа Гадаад хэргийн сайдын албан тушаалаасаа огцорсон байна.
Энэ мэт жишээг дурдвал маш олон. Дэлхийн улс орнуудын жишээнээс харахад парламентын гишүүдийг огцруулах, хариуцлага тооцох механизм нь улс орон бүрт өөр өөр хэлбэртэй ч нийтлэг зорилго нь авлига, ёс зүй, хууль зөрчлийг хязгаарлах, төрийн институцийн итгэлцлийг хамгаалах явдал байсаар байна.
.jpg)
.jpg)
