Монгол Улсын Засгийн газраас сүүлийн таван жилд ноолуурын үйлдвэрүүдэд эргэлтийн болон хөрөнгө оруулалтын хөнгөлөлттэй зээлийг дэмжлэгийг олгож, үр дүнд манай улс ноолуураа дотоодоо бүрэн самнах хүчин чадал хангалттай суурилагдсан байна.
Улсын хэмжээнд үйлдвэрүүдэд нийтдээ 13122 тонн самнасан ноолуур гаргах хүчин чадал суурилагдсан байгаагаас дотоодын хөрөнгө оруулалттай үйлдвэрүүд 8957 тн, гадаадын хөрөнгө оруулалттай үйлдвэрүүдэд 4165 тн самнасан ноолуур үйлдвэрлэхээр байна. Самнасан ноолуур экспортлох тухай техникийн зохицуулалт амжилттай хэрэгжсэнээр тус салбарын экспортын орлого 600-700 тэрбум төгрөгөөр нэмэгдэж, 4400 орчим ажлын байр шинээр бий болж, түүнийг дагаад улсын төсөвт төвлөрүүлэх татвар, шимтгэлүүд нэмэгдэнэ. Цаашлаад ноолуураа бүрэн боловсруулж, эцсийн бэлэн бүтээгдэхүүн болгосноор энэ салбараас 5.7 их наяд төгрөгийн орлого олох боломж бий. Ноолуур нь нэг талаас малчдын орлогын үндсэн эх үүсвэр, нөгөө талаас үндэсний боловсруулах үйлдвэрүүдийн үнэт түүхий эд юм. Монгол орны эрс тэс уур амьсгал, жилийн дөрвөн улирлын онцлогт тохируулан мал сүргийнхээ аясаар нүүдэллэн аж төрж ирсэн манай малчдын жилийн орлогын 40 гаруй хувийг ноолуурын борлуулалтын орлого бүрдүүлж байна.
Аймаг, бүсийн газар зүйн байршил, цаг агаар, ноолуур бэлтгэлийн хугацаа, ямааны үүлдэр угсаа зэргээс шалтгаалан ноолуурын өнгө, чанар өөр өөр байдаг. Аймгуудад ноолуур бэлтгэлийн идэвхтэй үе дунджаар 14 хоног байдаг ба зүүн аймгуудын ноолуур бэлтгэл 3 дугаар сарын сүүлээр эхэлдэг бол баруун аймгуудынх 5 дугаар сараас эхэлдэг байна. Ноолуураа эрт самнадаг аймгуудын хувьд хог, шороо, хялгас багатай ноолуур бэлтгэгддэг ба түүний анхан шатны боловсруулалтын буюу цэвэр ноолуурын гарц 60-65% байдаг. Харин баруун аймгуудын ноолуурын анхан шатны боловсруулалтын гарц 48-50% байдаг. Энэ нь түүхий ноолуурын үнэ ханш аймаг, сум бүрд харилцан адилгүй байхад нөлөөлдөг байна. Иймд түүхий ноолуурын зах зээлд нэг үнэ тогтоох боломжгүй, харин түүхий эдийн чанарт сууриласан жишиг үнийг аймаг бүрт ялгамжтайгаар тогтож байна.
