Хятадын эрх баригчид Монголын түүхийг харуулсан номын түүврийг худалдаалах, уншихыг хориглох шийдвэр гаргаж, эцэслэн баталлаа. Эрх баригчид уг шийдвэрээ Хятадын удирдагч "Ши Жиньпиний удирдлаган дор үндэсний нэгдмэл байдлыг бий болгох хүчин чармайлтын нэг хэсэг" хэмээн тайлбарлажээ.
Харин уг шийлвэрийг Хятадын эрх баригчид Өвөрмонголд хатуу хяналт тавьж байгаагийн зөвхөн нэг жишээ хэмээн үзэж Монголын соёл, хэлийг дэмжигчид эсэргүйцэж буй талаар олон улсын хэвлэлүүд мэдээлэв.
Тодруулбал, Өнгөрсөн наймдугаар сарын 25-нд ӨМӨЗО-ны Ном хэвлэл түгээх аж үйлдвэрийн нийгэмлэг мэдэгдэл гаргаж, гишүүддээ "Монгол угсаатны ерөнхий түүх"-ийн түгээлтийг зогсоохыг үүрэг болгож, "Зөв “Хятадын Коммунист” зарчмыг баримтлахыг уриалжээ. Мөн Хятадын эрх баригч намын шийдвэрээр номыг хориглохоос гадна боловсролын орчинд монгол хэлийг ашиглахыг бүхэлд нь хориглож, есдүгээр сарын 1-нээс Өвөрмонголд гурван жил үргэлжилсэн мандарин хэлийг бүх хичээлийг заадаг цорын ганц хэл болгох шилжилт дууссан байна.
Тус мэдэгдэлд, "Нягтлан шалгасны дараа бид Монголын түүхийн олон боть цувралын түгээлтийг түр зогсоож, лангуунаас нэн даруй устахыг тушааж байна. Бид үзэл суртлын хүрээнд эрсдэлээс урьдчилан сэргийлэх, шийдвэрлэх ажлыг эрчимжүүлж, ном түгээх эх үүсвэрт үр дүнтэй хяналт тавих ёстой” гэжээ.
Нью-Йоркт төвтэй Өмнөд Монголын хүний эрхийн мэдээллийн төвийн захирал Энхэбатугийн Тогочог, олон боть түүх нь Монголын тухай цорын ганц хориглогдсон ном биш. Номын сангуудын монгол ном хэвлэлийг тавиураас буулгаж, Хөх хотын сургуулиуд монгол сурах бичгийг шатааж байгааг бид мэдсэн. Ингэхдээ "Өвөр Монголын түүх соёл", "Монголын түүх", "Бор-тохайн түүх соёл", "Хөлөн- Түүх, соёл” зэрэг хэд хэдэн ном мөн дунд, бага сургуулийн сургалтын хөтөлбөрөөс "Хорчингийн түүх, соёл"-ын туршилтын хэвлэлийг хассан.
Хятадын засгийн газар монгол ном хэвлэлийг хориглох нь эрчимтэй нэмэгдэж байгаа нь гайхах зүйл биш. Энэ бол Хятадын засгийн газрын монгол хэл, соёл, өвөрмөц байдлыг устгахад чиглэсэн томоохон хүчин чармайлтын салшгүй хэсэг байсаар ирсэн.
Хоёр дахь үеийн хос хэлний боловсрол” нэрийн дор хэрэгжиж буй энэ бодлогыг дэлхий даяарх монголчууд соёлын хоморголон устгалын нэг хэлбэр хэмээн үзэж байна” гэсэн байна.
Мөн энэ талаар Монголын соёл, хэлийг дэмжигчид "Америкийн дуу хоолой" радиод өгсөн ярилцлагадаа “Үндэсний эрх чөлөө, уламжлалт ахуйгаа хадгалах үндсэн эрхээ аль хэдийн алдсан 6 сая Өвөрмонголчуудын хувьд хэл бол үндэсний өвөрмөц байдлын сүүлчийн түшиц газар юм. Олон эцэг эхчүүдийн хувьд Өвөр Монголын монгол хэлний боловсролын нөхцөл байдал "тэсвэр тэвчээрийн сорилт" болж хувирсан. Хятадын бодлого шийдвэр нэгэнт өөрчлөгдөхгүй тус цаашид гэрийн нөхцөлд төрөлх хэлээ авч үлдэхээр хичээх боловч энэ нь бараг бүтэшгүй зүйл болно байх” хэмээжээ.
Эх сурвалж: Voanews
