“MongolZ” багийнханд зориулсан ханын зураг Улаанбаатар хотын зүрхэн хэсэгт нээлтээ хийхтэй зэрэгцэн багийн гишүүд өөрсдийн үнэнч фенүүдтэйгээ уулзах онцгой үйл явдал тохиох юм.
Тодруулбал тэдний хувьд Азийн бүх томоохон тэмцээнд оролцох эрхээ авсан амжилттай жил байсан бөгөөд өдгөө MongolZ баг HLTV-ийн чансаагаар дэлхийд есдүгээр байрт, Valve Global-ийн чансаагаар тавдугаарт бичигдэж байгаа юм. Энэ бол бүх цаг үеийн Ази багуудын дунд хамгийн өндөр амжилт гаргасан түүхэн үзүүлэлт болоод байна. Мөн хамгийн сүүлд Thunderpick World Championship 2024 тэмцээнд түрүүлж, YaLLa Compass 2024, MESA Nomadic Masters Spring 2024 зэрэг хэд хэдэн олон улсын тэмцээнд багаараа ялснаар шилдгүүд гэдгээ дахин баталжээ. Мөн CS багууд дундаа хожсон шагналын нийт мөнгөн дүнгээрээ дэлхийд дөрөвдүгээр байрт явж буй. Тэгвэл энэ сард буюу арваннэгдүгээр сарын 22-ний өдөр MongolZ баг бүрэн бүрэлдэхүүнээрээ өөрсдийн дэмжигч, фенүүдтэйгээ уулзаж, баярт мөчөө тэмдэглэх аж.
.jpg)
.jpg)
