Гэр бүл, хөдөлмөр, нийгмийн хамгааллын яам, Японы олон улсын хамтын ажиллагааны байгууллага болох ЖАЙКА-тай хамтран хэрэгжүүлдэг “Хөгжлийн бэрхшээлтэй иргэдийн хөдөлмөр эрхлэлтийг дэмжих тогтолцоог бэхжүүлэх "DPUB 2 төсөл”-ийн үр дүн, тайланг хэлэлцжээ.
Төслийн хүрээнд:
- 200 гаруй ажлын байрны дадлагажигч бэлтгэх үндэсний сургагч багшийг сургасан
- Бэлтгэсэн ажлын байрны дадлагажуулагчид 223 хөгжлийн бэрхшээлтэй иргэнд дэмжих үйлчилгээ үзүүлснээс 151 нь байнгын ажлын байртай болсон
- Хөгжлийн бэрхшээлтэй 37 хүнийг ААНБ-уудад нөлөөлөх хүний нөөцөөр бэлтгэж, нөлөөллийн семинарыг 20 удаа зохион байгуулж, 469 байгууллагын 743 хүнийг хамруулсан байна.
Монгол Улсын хөгжлийн бэрхшээлтэй иргэдийн тоо хүн амын тоотой харьцуулахад өндөр. Тодруулбал, 3.5 сая иргэнтэй мөртлөө хөгжлийн бэрхшээлтэй 112 мянган иргэн байгаа талаар Гэр бүл, хөдөлмөр, нийгмийн хамгааллын сайд Л.Энх-Амгалан мэдэгдлээ. Тэрбээр энэ талаар "Энэ нь 112 мянган хүний эрхийг хамгаалах, сурах, хөгжих, эрүүл мэндийн үйлчилгээ авах, нөхөн сэргээх, хөдөлмөр эрхлэх, нийгэмдээ бие даан амьдрах тогтолцоог бий болгох шаардлага бий. 112 мянган хөгжлийн бэрхшээлтэй иргэдээс хөдөлмөрийн насны 15-63 насны 93 мянган хүн байгаа бөгөөд тэдгээрийн 15 мянга нь хөдөлмөр эрхэлж байгаа нь бага тоо юм. Бусад улсуудын хөгжлийн бэрхшээлтэй иргэдийн дундаж хөдөлмөр эрхлэлт 30 хувьтай байна. Манайх 15 хувь байгаа нь бусад улсаас 2 дахин бага. Цаашдаа хөгжлийн бэрхшээлтэй иргэдийн хөдөлмөр эрхлэлтийн түвшинг хэмжиж, зарлаж байх ёстой. Мөн хөгжлийн бэрхшээлтэй иргэдийн хөдөлмөрийн чадвар алдалтыг олон улсын ICF аргачлалыг Монгол Улсдаа нэвтрүүлэх зайлшгүй шаардлага байгаа гэж үзэж байгаа. Үүнд үндэслэж хөгжлийн бэрхшээлтэй иргэдийн бэрхшээлийн онцлогт тохирсон, харааны бэрхшээлтэй, сонсголын бэрхшээлтэй, хөдөлгөөний, оюуны зэрэг хавсарсан бэрхшээлтэй хүмүүст хөгжлийн бэрхшээлийн онцлогт тохирсон чадварыг нөхөн сэргээх, хөдөлмөр эрхлэх ур чадвар, боломжоор нь хангах үндэсний тогтолцоог хийх ёстой" гэлээ.
ЭХ СУРВАЛЖ: ГБХНХЯ
