Ус цаг уур, орчны судалгаа, мэдээллийн хүрээлэнгээс гаргасан мэдээллээр 2026 оны тавдугаар сарын 31-ний байдлаар бэлчээрийн ургамлын ургалт улсын хэмжээнд харилцан адилгүй байгаа бөгөөд нийт нутгийн ойролцоогоор 40 хувьд сайн, 40 орчим хувьд дунд, 20 гаруй хувьд муу үнэлгээтэй байна.
Бэлчээрийн ургамлын ургалт муу байгаа бүсэд Дундговь, Өвөрхангай, Баянхонгор, Баян-Өлгийн ихэнх нутаг, мөн Ховд, Завхан, Говь-Алтай, Өмнөговийн зарим сум, түүнчлэн Архангай, Увс, Төв, Хөвсгөлийн цөөн сум хамрагдаж байна. Харин ургамлын ургалт сайн байгаа бүсэд Дорнод, Орхон, Дархан-Уул, Говьсүмбэр аймгийн нийт нутаг, мөн Хөвсгөл, Хэнтий, Сэлэнгэ, Дорноговь, Булганы ихэнх хэсэг, Төв, Өмнөговь, Увс, Сүхбаатарын зарим сум, түүнчлэн Ховд, Говь-Алтай, Завханы цөөн сум багтаж байна. Бусад нутгаар бэлчээрийн ургамлын ургалт дунд зэрэг түвшинд үнэлэгджээ. Мөн өмнөх арав хоногийн үзүүлэлттэй харьцуулахад Дорноговийн ихэнх нутаг, Булган, Сүхбаатар, Увсын зарим сумдын бэлчээрийн ургамлын ургалтын байдал сайжирсан нь ажиглагдсан байна. Мэргэжилтнүүдийн үзэж буйгаар цаашдын хур тунадасны хэмжээ, тархалт нь бэлчээрийн нөхцөл байдалд голлон нөлөөлөх бөгөөд малчид цаг агаарын мэдээллийг тогтмол авч, бэлчээр ашиглалтаа зохистой төлөвлөх шаардлагатай байгааг онцолж байна.
