Архангай аймагт тахианы махны хордлогоор олон хүн өвдөж, эмнэлэгт хүргэгдээд буй талаар олон нийтийн сүлжээнд тархаад буй. Уг асуудлыг Архангай аймгийн Эрүүл мэндийн газрын дарга Р.Гандиймаагаас тодрууллаа.
Тэрбээр "Энэ оны наймдугаар сарын 18-20-ны өдрүүдэд Архангай аймгийн төвд байрлалтай сүлжээ хоолны газраар үйлчлүүлж, тахианы махтай хоол идсэн иргэд хордлогод орсон тохиолдол гарсан. Тус мэдээлэл үнэн. Манай Нэгдсэн эмнэлэгт 26 хүн бөөлжих, суулгах, дотор муухайрах гэх мэт хордлогын шинж тэмдэгтэй ирсэн. Эмнэлгийн зүгээс хордлого тайлах эмчилгээг цаг алдалгүй хийсэн. Тахианы махны хордлогын улмаас ирсэн 26 хүний биеийн байдал тогтворжсон. Мэргэжлийн хяналтын улсын байцаагч нар уг асуудлыг шалгаж байгаа. Илүү тодорхой мэдээлэл гарахаар мэдээлэл өгье"гэв.
