АНУ-ын Батлан хамгаалахын сайд Пит Хэгсэт "Signalgate" хэмээх маргаантай асуудалд оролцсон эсэхийг шалгах мөрдөн байцаалтыг эхлүүлжээ. Учир П.Хэгсэт болон бусад өндөр албан тушаалтнууд нууцлалтай цэргийн мэдээллийг "Сигнал" мессежийн аппликейшнээр хуваалцсан гэх мэдээллээс үүдэлтэй юм.
Гуравдугаар сарын 15-нд Пит Хэгсэт Йемений хуситуудын эсрэг цохилтын төлөвлөгөөг Сигнал аппликейшнээр Д.Трампын засаг захиргааны өндөр албан тушаалтнуудад илгээсэн боловч санамсаргүйгээр “The Atlantic” сэтгүүлийн редактор Ж.Голдбергийг уг чатад нэмсэн байдаг. Харин Ж.Голдберг уг мессежүүдийг нийтэлснээр уг асуудал олон нийтэд ил болжээ.
Пит Хэгсэт нууцлалтай “дайны төлөвлөгөө” хуваалцсан гэдгийг үгүйсгэж байгаа ч мессежүүдэд зэвсэг ашиглах цагийн хуваарь зэрэг мэдээлэл байсан гэж мэдээлэгдэж байгаа юм. Энэхүү мөрдөн байцаалт нь Сенатын Зэвсэгт хүчний хорооны удирдагчид болох Рожер Викер, Жек Рид нарын хамтарсан хүсэлтийн дагуу эхэлсэн бөгөөд засгийн газрын "мэдрэмтгий" мэдээллийг хамгаалахад чиглэгдэж байна гэжээ.
АНУ-ын Үндэсний аюулгүй байдлын зөвлөх Майк Вальц уг чатыг үүсгэсэн бөгөөд сэтгүүлч Ж.Голдбергийг санамсаргүйгээр нэмсэн гэж мэдэгдсэн юм. АНУ-ын Ерөнхийлөгч Д.Трамп Хэгсэт болон Вальцыг дэмжиж буйгаа илэрхийлсэн ч уг асуудал нь засаг захиргааны дотоодод болон олон нийтийн дунд шүүмжлэл дагуулсаар байгаа юм.
Эх сурвалж: New York Post
