БНСУ-ын Үндсэн хуулийн шүүх өнөөдөр /2025.04.04/ шийдвэрээ танилцуулж, ерөнхийлөгч Юн Сок Ёолыг огцруулах шийдвэр гаргалаа.
Түүнийг өнгөрсөн оны арванхоёрдугаар сард цэргийн дэглэм тогтоох тухай зарлиг гаргасантай нь холбогдуулан парламентын гишүүдийн олонх огцруулахыг дэмжсэн юм. Улмаар түүний бүрэн эрхийг түдгэлзүүлсэн. Түүний шүүх хурал энэ оны хоёрдугаар сард дууссан бөгөөд ийнхүү Үндсэн хуулийн шүүх сар гаруй хугацааны дараа шийдвэрээ танилцуулж байгаа юм.
Шүүгч тайлбарыг унших үеэрээ Ерөнхийлөгч Юн Сок Ёол цэргийн дэглэм тогтоохдоо хуулиа дагаж мөрдөөгүй гэх үндэслэлийг тайлбарлав. Мөн онц байдал зарлах нөхцөл биш байсан бөгөөд өөр аргаар шийдвэрлэх боломжтой байсан бөгөөд түүний шийдвэр хуулиа дээдлэх зарчим болон ардчиллыг зөрчсөн гэлээ. Ийнхүү БНСУ-ын ерөнхийлөгчийг огцруулах шийдвэр гаргаснаар шинэ ерөнхийлөгчийн сонгуулийг 60 өдрийн дотор зохион байгуулах ёстой болж байна.
