УИХ-ын гишүүн асан Л.Гүндалай нь төрсөн эгчийнхээ хүү О.Одсүрэнгийнхээ нэр дээр Зайсан толгойн орчимд "Жуулчны бааз"-ыг зориулалтаар 7.5 га газар авч, улмаар түүнийгээ зориулалтын бусаар ашиглан барилгын компаниудад зарж, хөрөнгөжсөн талаарх баримт мэдээллийг бид өмнө нь бэлтгэн хүргэж байсан билээ. Тус мэдээллийг ЭНД ДАРЖ үзнэ үү.
ВИДЕО:
Тэгвэл Л.Гүндалайн эхнэр Л.Аззаяагийн эзэмшлийн "Батсарай" ХХК нь Богдхан уулын дархан цаазат тусгай хамгаалалттай газар нутгийн Зайсангийн аманд байрлах бусдын эзэмшлийн ашиглах эрх бүхий газарт дур мэдэн дулаан дамжуулах төвийн барилга барьж, уг барилга дээр нэр бүхий иргэн нь давхар нэмж барин хууль бусаар улсын бүртгэлийн байгууллагад бүртгүүлэн үл хөдлөх эд хөрөнгийн гэрчилгээ гаргуулан авч улмаар дахин хууль бусаар бусдад шилжүүлсэн. Улмаар хоёр шатны шүүхийн шийдвэрээр тухайн үл хөдлөх хөрөнгийг буулгаж, газрын чөлөөлөх шийдвэр гарсан ч шүүхийн шийдвэрийг биелүүлэхгүй байгаа гэх хэрэгт холбогдсон байна.
Тодруулбал, “Жэй Эн моторс тур” ХХК-ийн нэхэмжлэлтэй, “Батсарай” ХХК, “Мфикс капитал” ХХК-д холбогдох иргэний хэргийг хариуцагч “Батсарай” ХХК-ийн төлөөлөгч Л.Аззаяагийн гаргасан гомдлыг Улсын дээд шүүх энэ сарын 01-ний /2025.04.01/ хянан хэлэлцжээ.
Тус шүүхээс хоёр шатны шүүх нэхэмжлэлийн шаардлага, түүний үндэслэл тодорхойгүй буюу буулгуулахаар маргаж буй үл хөдлөх хөрөнгийн талаар тодорхой мэдээлэл хэргийн баримтаар авагдаагүй, хэрэгт ач холбогдол бүхий нөхцөл байдал бүрэн тогтоогдоогүй байх тул хариуцагч “Батсарай” ХХК-ийн гомдлын зарим хэсгийг хангаж, анхан болон давж заалдах шатны шүүхийн шийдвэр, магадлалыг хүчингүй болгож, хэргийг дахин хэлэлцүүлэхээр анхан шатны шүүхэд буцааж шийдвэрлэсэн байна.
Тэгвэл анхан болон давж заалдах шатны шүүх тус хэргийг хэрхэн шийдвэрлэж байв гэдгийг хөөн үзлээ. Богдхан уулын дархан цаазат тусгай хамгаалалттай газар нутгийн Зайсангийн аманд байрлах бусдын эзэмшлийн ашиглах эрх бүхий газарт дур мэдэн дулаан дамжуулах төвийн барилга барьж, уг барилга дээр нэр бүхий иргэн нь давхар нэмж барин хууль бусаар улсын бүртгэлийн байгууллагад бүртгүүлэн үл хөдлөх эд хөрөнгийн гэрчилгээ гаргуулан авч улмаар дахин хууль бусаар бусдад шилжүүлсэн гэх хэргийг анх 2018 онд Нийслэл дэх Захиргааны хэргийн анхан шатны шүүх хэлэлцээд үл хөдлөх эд хөрөнгийн өмчлөх эрхийн ** дугаарт бүртгэсэн бүртгэлийг илт хууль бус болохыг тогтоож, бүртгэлийг хүчингүй болгож шийдвэрлэсэн байна. Мөн давж заалдах шатны шүүх анхан шатны шүүхийн дээрх шийдвэрийг хэвээр үлдээж байжээ.
Гэвч шүүхийн шийдвэр ийн гарсан атал хариуцагч тал шүүхийн шийдвэрийг эс биелүүлсэн байна. Тиймээс нэхэмжлэгч тал ашиглах эрх бүхий газар дээр байрлаж байгаа барилга болон түшиц ханыг буулгаж, газар чөлөөлүүлэхээр дахин иргэний хэргийн шүүхэд хандсан байгаа юм.
Энэ дагуу Нийслэл дэх Захиргааны хэргийн анхан шатны шүүх 2024 оны аравдугаар сарын 14-ний өдөр уг хэргийг хэлэлцээд "барилга болон түшиц ханыг буулгаж, газрыг чөлөөлж өгөхийг хариуцагч нарт даалгаж" шийдвэрлэжээ. Уг шийдвэрийг Нийслэлийн Эрүүгийн хэргийн Давж заалдах шатны шүүх энэ оны нэгдүгээр сарын 10-ны өдөр мөн хэвээр үлдээсэн байна. Гэсэн ч хариуцагч тал болох Л.Гүндалайн эхнэр Л.Аззаяагийн "Батсарай" ХХК анхан болон давж заалдах шатны шүүхийн шийдвэр, магадлалыг эс зөвшөөрч, Улсын дээд шүүхэд хандсанаар уг хэргийг тус шүүх хэлэлцэн шийдвэрлэсэн нь энэ аж.
Товчхондоо, бусдын эзэмшлийн газар дээр хууль бусаар барилга барьж, үл хөдлөх хөрөнгийн гэрчилгээ гаргуулж авсан гэх барилга, түшиц ханыг буулгаж, газрыг чөлөөлүүлэх "Батсарай" ХХК-д холбогдох хэргийг дахин анхан шатны шүүхээр хэлэлцэхээр болжээ. Бид уг хэргийн талаар эргэн мэдээлэх болно.
