УИХ-ын чуулганы хуралдаан үргэлжилж байна. Хуралдаанаар АТГ-ын дарга З.Дашдавааг улираан томилох асуудлыг хэлэлцэж байгаа юм. Хэлэлцэж буй асуудалтай холбогдуулан УИХ-ын гишүүд асуулт асууж, байр сууриа илэрхийлж байна.
УИХ-ын гишүүн П.Сайнзориг: - Авлигын төсөөллийн индекс бол АТГ-ын ажил биш. Засгийн газар, УИХ ажлаа хэрхэн хийж байгаа вэ гэдэг л асуудал юм. Өөрөөр хэлбэл бид өөрсдөөсөө өөдрөг төсөөллийг шаардах ёстой болж байна. Улс төрийн намын санхүүжилтийн тухай хууль, Төрийн өмчит компанийн тухай хууль, Тендер худалдан авалтын тухай хуулийг, Засаглалын асуудлыг шүгэл үлээгчийн эрх зүйн байдлын тухай хуулийг батлах асуудал байгаа юм. Үүний дараа авлигатай тэмцэх процесст ахиц гарна. Мөн сүүлийн 30 орчим жил нийгмийн суурь бүтцүүд дээрээ хөрөнгө оруулалт хийгээгүй. Цахилгаан станц дээр гэхэд сүүлийн 40 жил ямар ч ахиц дэвшил гараагүй. Тэгэхээр дэд бүтцийн хүртээмжгүй байдал нь өөрөө авлигын суурь шалтгаан болж байна. Ийм хүртээмжгүй байдал дээр эрх мэдэлтний үүдийг сахиж гарыг нь хүндрүүлэх асуудал явдаг. Тэгэхээр ийм зүйлүүдийг шийдэхгүйгээр өнөөдөр бид индекс яриад нэмэргүй юм. Хууль хяналтын байгууллагын оролцоо энэ төсөөллийн ердөө 13 хувийг эзэлдэг. Бид энэ төсөөллийг урагшлуулахын тулд иргэдийн үндсэн эрх эрх чөлөөг хамгаалах асуудлыг сайжруулах шаардлагатай байна. Иргэд маань ч сэтгэлгээний хувьд сайжирмаар байна. Үр хүүхдээ хүмүүжүүлэхдээ хүний дор битгий ороорой гэж биш хүнд битгий төвөг болоорой гэж захиж сургадаг баймаар байна.
УИХ-ын гишүүн Б.Пүрэвдорж: З.Дашдаваа даргыг зарчмын хувьд дэмжиж байна. 2016 оноос хойш эрх баригчдын хулгай дийлдэхээ больсон л доо. Ковидын хулгай, төсвийн хулгай, нүүрсний хулгай, ногоон автобусны хулгай, оффтейкийн хулгай гээд гаарсан. Тухайлбал, нүүрсний хулгай 44 их наядын хохиролтой гэдэг нь үнэн шүү дээ. 2019 оноос өмнө "Цагаан хад- Ганц мод"-ны боомтын хооронд 29 км зайд нэг машин нүүрсийг гурван сая төгрөгөөр тээвэрлэдэг байсан бол цар тахлын үеэр 129 сая төгрөг болгоод хулгай хийчихсэн. Өдөрт 600 машин 129 сая төгрөгөөр тээвэр хийгээд явахад нэг жил найман сарын хугацаанд 44 их наяд төгрөг болчихож байна. Энэ хулгайг дээр дооргүй бүгдээрээ нийлцгээж байгаад хийцгээсэн. Тийм учраас энэ асуудал дээр цаашид маш хариуцлагатай ажиллах ёстой. Тэгэхээр нүүрсний хулгайг яаж шийдэж байгаа талаар З.Дашдаваа даргаас асуумаар байна. С зөвшөөрөл далд хэлбэрт орчихсон. Ер нь эрх баригч намынхан хэтэрхий их авлигажуулж байна.
АТГ-ын дарга З.Дашдаваа: 2022 онд нүүрсний хулгайн хэргийг шалгах ажлын хэсэг байгуулагдсан. Нүүрсний хэрэг дээр нийтдээ 103 хэрэг нээн шалгасан. Үүнээс одоогийн байдлаар 17 хэрэг шүүхэд шилжүүлсэн байна. 14 хэрэг нь хэрэгсэхгүй болсон.
УИХ-ын гишүүн С.Эрдэнэболд: Сая хоёрдугаар сарын 3, 4-нд утааны сонсгол болсон. Анзаарч байхад хүмүүс дулаан цаг ирэнгүүт энэ асуудлыг мартчхаж байгаа юм. Өнгөрсөн 10 жилийн хугацаанд 1.8 их наяд төгрөгийн зардлыг утааг бууруулахад зарцуулсан байгаа юм. Энд 190 гаруй тэрбум төгрөгийн зөрчил одоогийн байдлаар мэдэгдсэн гэж үзэж буй. Монгол хүний эрүүл, аюулгүй орчинд амьдрах эрхийг ноцтойгоор зөрчиж байгаа энэ асуудлыг далайцтай шийдэж чадахгүй байгаагийн цаад нууц нь энд мөнгө угаалт явагддаг байж болзошгүй нөхцөл байдал, дээр нь янз бүрийн төсөл хөтөлбөрөөр татвар төлөгчдийн мөнгийг завшдаг байж болзошгүй байгаа юм. Уг асуудалд хэрхэн анхаарч ажиллаж байгаа вэ.
АТГ-ын дарга З.Дашдаваа: Миний хувьд ирэх зургаан жилд хийх ажлын концепц бол хүнтэй тэмцэхээс илүү тогтолцоо руугаа анхааръя гэж бодож байгаа. Өнөөдөр хуулиас давсан журмууд гаргаад хүнд суртал үүсгэдэг. Хуулиас давсан шийдвэрүүд гаргаад төрийн албан тушаалтан аливаа асуудлыг хүндрүүлдэг асуудлыг УИХ, ЗГ-тай хамтарч ажиллана гэж бодож байгаа. Эхний ээлжид журмуудыг цэгцлэх чиглэлд тодорхой ажлууд хийгээд явж байгаа. Олон нийтээс ч шүүмжилж байгаа нэг асуудал нь та нар акулуудтайгаа тэмцэж чадахгүй жижиг загаснуудаа бариад байна гэдэг. Цаашид үйл ажиллагаагаа сайжруулж ажиллана гэж зорьж байна.
