Хэнтий, Дорнод, Сүхбаатар аймгуудын нутаг дэвсгэрт хээрийн түймэр гарч 38 гэр, дөрвөн автомашин, хоёр мотоцикл, 48 хашаа саравч, 6000 гаруй бог, 48 бод мал, 3500 гаруй боодол өвс өртсөн.
Улмаар түймэрт өртсөн малчдад туслах санаачилгыг Дундговь аймгийн Засаг дарга С.Мөнхчулуун гаргаж, "Нэг өрх-нэг хонь" хандивын аянд нэгдэхийг уриалж эхэлсэн юм. Гуравдугаар сарын 15-наас энэ сарын 1-ний хооронд зохион байгуулсан хандивын аянд Дундговь аймгийн 2317 малчин, 90 компани, төрийн болон төрийн бус байгууллага нэгджээ. Тэд энэ хугацаанд 67 сая төгрөг, 2920 хонь, 586 ямаа, гурван адуу, хоёр тэмээ, нэг үхэр цуглуулсан байна. Мөн хүнсний бүтээгдэхүүн, малын тэжээл, нэмнээ, хүүхдийн оёмол, сүлжмэл гутал, хувцас зэрэг эд зүйлс хандивт иржээ.
