Мьянмарт газар хөдлөлтийн улмаас 2900 гаруй хүн амиа алдсаны дараа тус улсын цэргийн засаглал буюу Хунта нар иргэний дайнд түр гал зогсоох шийдвэр гаргасныг төрийн өмчит MRTV телевизээс иш татан “Ройтерс” агентлаг мэдээллээ.
Цэргийнхэн энэ сарын 2-ноос 22-ны хооронд мөргөлдөөнөө зогсоох бөгөөд энэ нь газар хөдлөлтийн дараах аврах ажиллагаанд дөхөм үзүүлэх зорилготой гэж мэдэгдсэн байна. Үүний өмнөх өдөр Мьянмарын зэвсэгт босогчдын хамгийн том эвслийн нэг болох Гурван ахан дүүсийн холбоо буюу Three Brotherhood Alliance мөн нэг сарын хугацаанд довтолгоогоо зогсоож, зөвхөн өөрийгөө хамгаалах зорилгоор байлдааны ажиллагаа явуулах шийдвэр гаргажээ.
Тодруулбал, гуравдугаар сарын 28-ны баасан гарагт болсон хүчтэй газар хөдлөлтийн улмаас Мьянмарт олон мянган хүн амиа алдаж, хот суурин газрууд нурж, гамшгийн байдал үүссэн. Гэвч хунта газар хөдлөлтийн дараа ч эрх мэдлээ хадгалахыг эрмэлзэж, гамшигт нэрвэгдсэн бүс нутгуудад агаарын цохилтоо үргэлжлүүлж, хүмүүнлэгийн тусламжийн урсгалыг хаасан талаар эх сурвалжууд мэдээлж байна. Мьянмарт 2021 оны цэргийн эргэлтээс хойш иргэний дайн үргэлжилж, сөрөг хүчний босогчид олон нутгийг хяналтдаа авч, хунтын армитай ширүүн тэмцэл өрнүүлж байгаа билээ.
Эх сурвалж: Reuters
