Оросын шууд хөрөнгө оруулалтын сангийн тэргүүн Кирилл Дмитриев энэ долоо хоногт АНУ-ын нийслэл Вашингтонд айлчилж, тус улсын Ерөнхийлөгч Д.Трампын Ойрхи Дорнодын асуудал эрхэлсэн тусгай элч Стив Виткоффтой уулзахаар болжээ.
CNN агентлагийн мэдээлснээр, К.Дмитриевийн айлчлалын гол зорилго нь “Украины дайныг зогсоохыг эрмэлзэж буй АНУ, Оросын харилцааг бэхжүүлэх” явдал юм гэжээ. Түүний энэхүү айлчлал нь 2022 онд Орос улс Украинд довтолсноос хойшхи Оросын өндөр албан тушаалтнуудын Вашингтонд хийж буй анхны айлчлал болж байна. Мөн энэ үйл явдал нь Д.Трамп нэгдүгээр сард засгийн эрхэнд эргэн ирснээс хойш АНУ, Оросын харилцааг сэргээх чиглэлд хийж буй нэг алхам гэж ажиглагчид үзэж байна.
К.Дмитриев нь ОХУ-ын Ерөнхийлөгч В.Путинтэй ойр дотно харилцаатай бөгөөд өмнө нь Эр-Риядад болсон уулзалтад оролцож, Орос, Америкийн төлөөлөгчид Украины асуудлыг хэлэлцэхэд оролцож байжээ. Түүнчлэн Америкийн багш Марк Вогелийг суллах ажиллагаанд оролцсон тухай CNN мэдээлжээ.
АНУ-ын эрх баригчид К.Дмитриевт тавьсан хориг арга хэмжээгээ түдгэлзүүлж, Төрийн департамент түүнд АНУ-д зорчих виз олгохоор шийдвэрлэжээ. Өөр нэгэн эх сурвалжийн мэдээлснээр, АНУ-ын Сангийн яам хориг арга хэмжээгээ түр зогсоох хүсэлтийг хүлээн авсан байна. Энэхүү айлчлал нь АНУ, Оросын харилцаанд ямар өөрчлөлт авчрах нь анхаарал татаж байна.
Эх сурвалж: BBC
