Энхийг сахиулагчдын гуравдугаар ээлж өнөөдөр буюу Монгол бахархлын өдөр эх орондоо ирлээ.
Тодруулбал, БНӨСУ-д явагдаж байгаа НҮБ-ын мандаттай UNMISS ажиллагаанд үүргээ нэр төртэй гүйцэтгэсэн Монгол Улсын Зэвсэгт хүчний XIII ээлжийн гуравдугаар цуврааны энхийг сахиулагчдыг Зэвсэгт хүчний Хяналт-шинжилгээ, үнэлгээний газрын дарга хурандаа С.Баяр-Очир, ЗХЖШ-ын Энхийг дэмжих, цэргийн хамтын ажиллагааны хэлтсийн дарга хурандаа Д.Мягмаржав нар угтан авч, баяр хүргэсэн юм. Мөн хурандаа С.Баяр-Очир энхийг сахиулагчдыг тээвэрлэн авчирсан “МИАТ” ТӨХК-ийн “Чингис хаан” онгоцны хөлгийн ахмад Б.Очирбатаар ахлуулсан нисгэгчдэд чин сэтгэлийн талархал дэвшүүлж, үргэлжлүүлэн офицер, ахлагч бүрт баяр хүргэж, эх орондоо тавтай морилохыг урилаа.
