Монгол гэх нэрийг циркийн урлагаар тэр дундаа уран нугаралтаар дамжуулан дэлхийд таниулж буй олон гайхалтай уран бүтээлч залуус бий. Тэгвэл эдгээр залуусыг "Монгол хаан" жүжигт онцлон урьж, үзүүлбэр үзүүлж эхэлжээ. Тодруулбал, "Broadway" театрын тайзнаас эхлээд "Нарны цирк"-т хүртэл тоглож явсан монгол уран нугараач охид болох х.Ану-Үжин, х.Ичинхорлоо, х.Доржханд, х.Должинсүрэн нарыг "Монгол хаан" жүжгийн баг хамт олны бүрэлдэхүүнд урьж, жүжигтээ шигтгэжээ. Ийнхүү бид тэдний тоглолтынх нь завсраар цөөн хором ярилцсаныг хүлээн авна уу.
ВИДЕО:
-Анх "Монгол хаан" жүжигт тоглох саналыг хүлээн авахад ямар санагдсан бэ?
-Саналыг хүлээн авахад үнэхээр их догдолж байсан. Учир нь өмнө нь “Монгол хаан” жүжгийг уран нугаралтгүйгээр нь үзэж байсан юм. Үүний дараа бидэнд санал тавихад догдолж байсан ч ямар хэсэгт тоглож, юу үзүүлэх бол гэж гайхаж байсан. Улмаар хоорондоо ярилцаад орох хэсгийнхээ үзүүлбэрийг үзэхэд үнэхээр сэтгэлд багтсан л даа. “Монгол хаан” жүжгийн хувьд бүх хэсэгтэй Монголын өв соёлыг багтааж өгсөн байдаг.
Уран нугаралтаар Монголчууд хэдийнээ дэлхийд алдартай болчихсон шүү дээ. Түүнийг “Монгол хаан” жүжгийн нэгээхэн хэсэгт оруулж, таниулах болсноо нэр төрийн хэрэг гэж бодож байгаа.
-Дэлхийн томоохон шоунд гадаад уран бүтээлчидтэй ажиллах болон монгол уран бүтээлчидтэйгээ монгол уран бүтээлд ажиллах хоёр магадгүй нэлээд өөр байгаа байх тийм үү?
-Манай охидууд ихэнх нь дэлхийн томоохон шоунуудад оролцож байсан охидууд байдаг. Тухайлбал томоохон шоу, гала тоглолт, усан онгоцны шоу, нарны циркт тоглож байсан. Хэдийгээр гадаад хүмүүстээ ажиллах гоё ч гэсэн монгол хамт олонтойгоо “Монгол” гэх нэрийг гаднын орныхонд сурталчилж байгаадаа баяртай байгаа. Энэ нь илүү бахархалтай санагдаж байгаа.
-Өмнө нь яг ийм бүрэн хэмжээний жүжигт оролцож, үзүүлбэр үзүүлж байв уу?
-Уран нугаралтын хувьд дэлхийн аль ч тайз ялгаагүй байдаг. Бүх л газар очоод сандардаг. Сая Английн Broadway театрт үзүүлбэр үзүүлэхэд ч олон Монголчууд байсан учраас дулаан, гоё мэдрэмж байсан.
Бид ихэнх нь театрт үзүүлбэр үзүүлдэг ч гэсэн бүрэн хэмжээний зохиолтой үзүүлбэрт оролцож байгаагүй. Энэ санаа үнэхээр гоё бөгөөд үзэгчдэд ч шинэлэг содон байгаа байх.
-Лондонд тоглоод ирсэн шүү дээ. Ямар мэдрэмж төрж байв? Мөн цаашид Сингапурт тоглогдох "Монгол хаан" жүжгийн бүрэлдэхүүнд ч байгаа юу?
-Нэлээн хэдэн жилийн өмнөөс дэлхийд монгол уран нугаралтыг гүйцэхгүй гэдгийг батлаад харуулчихсан. Дэлхийн томоохон тайзнаа дандаа монгол уран бүтээлчид багтсан байдаг. Лондонд үнэхээр олон үзэгчийн өмнө томоохон тайзнаа тоглосон. Мөн “Монгол хаан” Монголын уран бүтээлчидтэй хамтран холливүүдийн алдартай уран бүтээлчид тоглох гэж байгаа нь үнэхээр нэр төрийн хэрэг гэж бодож байгаа.
.jpg)
