Ураныг эсэргүүцсэн нэр бүхий иргэд Зөөвч-Овоогийн уурхайн үйлдвэрийн хашааны гадна талд үхсэн зээр авчирч хаясан нь ил боллоо гэх дүрс бичлэг өнөөдөр цахим сүлжээнд цацагдсан.
Тухайн бичлэгт дөрвөн иргэн тээврийн хэрэгслээс олон тооны зээр буулган торон хашааны гадна авчирч тавьж буй нь гардаг. Тэгвэл уг асуудлыг Дорноговь аймгийн цагдаагийн газраас шалгаж эхэлсэн байна.
Ташрамд өгүүлэхэд, Байгаль орчныг хамгаалах болон Ан агнуур тухай хуулиар цагаан зээр агнахыг хориглодог байна. Нэг цагаан зээр агнасан бол иргэнийг 3-5 сая, аж ахуйн нэгжийн 30-50 сая төгрөгөөр торгодог хуулийн заалттай аж.
