УИХ-ын чуулганы нэгдсэн хуралдаанаар /2025.04.04/ Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах тухай хуулийн төсөл /хэлэлцэх эсэх/ болон бусад холбогдох хуулийн төслийг хэлэлцэж байгаатай холбоотойгоор гишүүд Хууль зүй дотоод хэргийн сайд О.Алтангэрэл болон ажлын хэсгийн гишүүдэд асуулт тавьж, хариулт авч байна.
Энэ үеэр УИХ-ын гишүүн Д.Мөнхбаатар: Эрүүгийн хуульд цахимтай холбоотой нилээн олон өөрчлөлт хийж байгаа юм байна. Цахим төхөөрөмжөөс устгасан мэдээллийг нотлох баримтад тооцно гэсэн байна. Энэ бол нилээн асуудалтай. Цахим баримтыг устгасан сэргээсэн тохиолдолд заавал тусгайлсан журам хэрэгтэй.
Хууль зүй дотоод хэргийн сайд О.Алтангэрэл: Нотлох баримтыг сэргээх асуудал хуулинд орж ирсэн. Гэмт хэргийн нөхцөл байдал өөрчлөгдөж, залилангийн хэргийн нөхцөл байдал 50-иас дээш хувь нь цахим залилан болж хувирсан. Дэлхийн улс орнуудад бүр 80 хувийг эзэлж байна. Тэгэхээр бидэнд цахим нотлох баримтыг сэргээх, цуглуулах, үнэлэх шаардлага гарч ирсэн. Эрүүгийн хэрэг хянан шийдвэрлэх хүрээнд цахим гэмт хэргийг шалгах гэхээр нэн даруй нотлох баримтаа устгадаг. Тэдгээрийг сэргээж гаргах шаардлагатай болдог.
