УИХ-ын гишүүн Даваагийн Цогтбаатарт холбогдох Эрүүгийн хэрэг гурван шатны шүүхээр эцэслэгдэж, шүүхээс торгох ял шийтгэгдсэн түүний бүрэн эрхийн асуудал өдгөө хөндөгдөх болоод байгаа.
Мөн Улсын дээд шүүхийн шийдвэр гарсан атал Дав.Цогтбаатарт оноосон ялыг ШШГЕГ биелүүлэхгүй байна гэх шүүмжлэл гарах болсон. Харин уг асуудалд ШШГЕГ-ын дарга Б.Нандинболор "Дээд шүүхээс Дав.Цогтбаатар гишүүнд холбогдох шийтгэх тогтоол ирүүлэхийгг хүлээж байна. Тогтоол ирснээр шийдвэр гүйцэтгэл явагдана" гэх тайлбарыг өгсөн байдаг.
Тэгвэл Улсын дээд шүүх ШШГЕГ-т хэзээ тогтоолыг хүргүүлэх талаар албаны эх сурвалжаас тодруулахад "Улсын дээд шүүхийн тогтоол албажиж, хэргийн оролцогч нарт тогтоолыг гардуулж өгсөн. Харин Улсын дээд шүүх шүүхийн шийтгэх тогтоолыг шууд ШШГЕГ-т хүргүүлэх хуулийн зохицуулалт байхгүй. Шүүхээс тогтоолыг анхан шатны шүүх рүү хүргүүлсэн. Тухайн шүүхээс ШШГЕГ-т шийтгэх тогтоолыг эцсийн байдлаар хүргүүлэх учиртай. Олон оролцогчтой хэрэг учир анхан шатны шүүх дээр удааширч байгаа байх" хариултыг өглөө.
