Архангай, Булган, Дорноговь, Дундговь, Завхан, Өвөрхангай, Өмнөговь, Төв, Хөвсгөл аймгийн зарим газар, Улаанбаатар хотод өнгөрсөн хоногт бороо, нойтон цас орлоо.
Өнөө өглөөний цаг уурын өртөө, харуулын мэдээгээр Хөвсгөл, Хангайн уулархаг нутгаар 0-6 см зузаан цас тогтжээ. Үүнээс хамгийн их нь Хөвсгөлийн Арбулагт 6 см, Архангайн Өлзийт, Тариат, Булганы Баян-Агтад 4 см, Хөвсгөлийн Цагаан-Уул, Өвөрхангайн Бүрд, Булганы Могодод 3 см, Архангайн Жаргалант, Төвшрүүлэх, Хангай, Булганы Хишиг-Өндөр, Эрдэнэтэд 2 см, бусад хэсгээр 0-1 см зузаан цас тогтсон байна.
Өнгөрсөн хоногт баруун аймгуудын нутгийн зүүн, говь болон төвийн аймгуудын ихэнх нутаг, зүүн аймгуудын нутгийн өмнөд хэсгээр 0-23 мм бороо, нойтон цас, цас оров. Үүнээс хоногийн нийлбэрээр хамгийн их нь Өмнөговийн Даланзадгад 23 мм, Дорноговийн Замын-Үүдэд 16 мм, Өмнөговийн Булганд 15 мм, Дорноговийн Хөвсгөл, Өмнөговийн Ноён, Дундговийн Лууст 12 мм, Дорноговийн Улаанбадрах, Өмнөговийн Хүрмэн, Дундговийн Сайнцагаанд 10.8-11 мм, бусад нутгаар 0-10 мм бороо, нойтон цас, цас оржээ.
Өчигдөр өдөр говь болон зүүн аймгуудын нутгаар 18-24 градусаар хүйтэрч, Дархадын хотгор, Хангайн уулархаг нутаг, Завхан голын эх, Идэр голын хөндий, говийн бүс нутгийн хойд хэсгээр -1 хэмийн хүйтнээс +5 градус дулаан, Хөвсгөл, Хэнтийн уулархаг нутаг, Хүрэнбэлчир орчим, говийн бүс нутгийн зүүн хэсэг, Дорнод-Дарьгангын тал нутгаар +5...+10 градус, Их нууруудын хотгор, Алтайн өвөр говиор +15…+21 градус, бусад нутгаар +10…+15 градус дулаан байв.
