Японы Засгийн газар баруун хязгаарын Ёнагуни арал дээр 2031 оны гуравдугаар сар гэхэд газар агаарын пуужингийн систем байрлуулахаар төлөвлөж буйгаа мэдэгдлээ. Тус арал нь Тайваниас ердөө 110 км зайд оршдог бөгөөд цэлмэг өдөр Тайванийн эрэг харагддаг байна. Япон улс пуужин байрлуулах хугацаагаа анх удаа ийнхүү тодорхой зарлаж байгаа бөгөөд уг төлөвлөгөөг 2022 онд анх танилцуулж байжээ.
БНХАУ Тайваныг өөрийн нутаг дэвсгэрийн нэг хэсэг гэж үздэг бөгөөд “нэгтгэх”-ийн тулд хүч хэрэглэхийг үгүйсгээгүй хэвээр байна. Үүнтэй холбоотойгоор бүс нутгийн хурцадмал байдал нэмэгдэж, Токио болон Бээжингийн харилцаа сүүлийн саруудад нэлээд мууджээ.
Японы Ерөнхий сайд Такаичи Санаэ өнгөрсөн арваннэгдүгээр сард Тайваньд халдлага гарвал Японы Өөрийгөө хамгаалах хүчин оролцож магадгүй хэмээн мэдэгдсэн нь Бээжингийн хүчтэй эсэргүүцэлтэй тулгарсан юм. Үүний дараа Хятад улс Японд дарамт шахалт үзүүлж, байлдааны хөлөг онгоц илгээх, газрын ховор элементийн экспортод хязгаарлалт тавих, жуулчлал болон соёлын арга хэмжээг хязгаарлах зэрэг алхам хийсэн байна. Мөн Японы 20 компани, байгууллагад экспортын хязгаарлалт тогтоосны дараахан Батлан хамгаалахын сайд Шинжиро Коизүми пуужин байрлуулах хугацааг албан ёсоор зарлажээ.
Ёнагуни аралд байрлуулах пуужин нь дунд тусгалын, дайсны нисэх онгоц болон пуужинг устгах зориулалттай систем байх аж. Сүүлийн 10 жилийн хугацаанд Япон Ёнагуни арлыг цэргийн түшиц болгон хөгжүүлж, одоогоор Өөрийгөө хамгаалах хүчний 160 орчим алба хаагч эргийн хяналтын үүрэг гүйцэтгэж байна. Мөн 2026 оны санхүүгийн жилд дайсны холбоо, радарын системийг саатуулах чадвартай цахим дайны нэгж байгуулахаар төлөвлөжээ.
