Нийслэлийн 141 дүгээр сургуулийн нэгдүгээр ангийн нэг бүлэгт 70 сурагч хуваарилагдсан гэх асуудал нийтийн шүүмжлэлийг дагуулаад буй. Тэгвэл уг асуудалд Боловсролын сайд П.Наранбаяр дараах байр суурийг илэрхийллээ.
Тэрбээр "141 дүгээр сургуульд энэ хичээлийн жилд зөвхөн нэгдүгээр ангид гэхэд 630 хүүхэд шинээр элсэн орж буй. Баянгол дүүргийн 26 дугаар хороо нь 20 гаруй мянган оршин суугчтай. Иймд барилга нэмж түрээслэх шаардлага, хэрэгцээ байна. Төр түрээслэх боломжийг судалж байна. Түрээслэгч талаас төрд барилгаа түрээслэхийг дэмжиж байгаа. Ингэснээр таван ангид 10 бүлэг хичээллэж, 141 дүгээр сургуулийн ачааллыг бууруулан хоёр ээлж рүү оруулах боломжтой болно" гэв.
