НИТХ өнгөрөгч долоо хоногийн баасан гарагт буюу 2025.03.28-ны өдөр ээлжит бусаар хуралдаж, нийслэлийн 2025 оны төсөвт тодотгол хийсэн.
-НИЙСЛЭЛИЙН ТӨСВИЙН ОРЛОГО ТӨЛӨВЛӨСНӨӨС 1.6 ИХ НАЯДААР ДАВЖ БИЕЛЖЭЭ-
Тодруулбал, нийслэлийн 2025 оны төсвийн нийт орлогыг 4.025 их наядаар баталсан ч 1 их наяд 664 тэрбум төгрөг нэмэгдсэн байна. Өөрөөр хэлбэл, 2025 оны нэгдүгээр улирлын байдлаар нийслэлийн төсвийн орлого төлөвлөснөөс 1,6 их наядаар илүү гарч, түүнийг юунд зарцуулах талаар НИТХ хуралджээ.
Улмаар дээрх 1.6 их наяд төгрөгөөс нийслэлийн үнэт цаасны шимтгэл болон свопын зардалд 18.3 тэрбум төгрөг, Засаг даргын нөөц хөрөнгө зардалд 5 тэрбум төгрөг, Хорооны хэсгийн ахлагч нарын урамшууллын зардалд 3.8 тэрбум төгрөг, Монгол Улсын Засгийн Газрын 33 дугаар тогтоол, НИТХ-ын холбогдох шийдвэрийн дагуу байгуулагдсан 4 байгууллагын үйл ажиллагааны зардалд 7.6 тэрбум төгрөгийг нэмж төсвийн тодотголд тусгасан байна.
-"АГРО СИТИ", "НАЛУУ УХАА" ХОТУУДЫН ЗАХИРАГЧИЙН АЖЛЫН АЛБЫГ БАЙГУУЛАХАД 2.6 ТЭРБУМ ТӨГРӨГ ТӨСӨВТ ТУСГАСАН-
Мөн гэрээ байгуулагдаагүй 15 төсөл, арга хэмжээний 86 тэрбум төгрөгийг хасаж, бодит гүйцэтгэл, санхүүжилттэй уялдуулан 2 төсөл, арга хэмжээний санхүүжих дүнг 16 тэрбум төгрөгөөр бууруулж, нийт 116 тэрбум төгрөгийн эх үүсвэрийг шинээр хэрэгжих 33 төсөл арга хэмжээг санхүүжүүлэхээр тооцжээ.
Шинээр хэрэгжих энэхүү 33 төсөл арга хэмжээнд “Агро сити”, “Налуу Ухаа”, “Хүннү”, “Эмээлт” гэсэн дөрвөн дагуул хот байгуулах ажил багтаж байна.
Тухайлбал, “Агро сити” хотын захирагчийн ажлын албыг шинээр байгуулахад 1.4 тэрбум төгрөг, “Налуу Ухаа” хотын захирагчийн албыг шинээр байгуулахад 1.2 тэрбум төгрөг төсөвлөсөн байв. Мөн “Хүннү” хотын бүтээн байгуулалтын мэдээлэл, сурталчилгааны төв, ногоон барилгын ажлын зураг төсөв, зөвлөх үйлчилгээнд 680 сая төгрөг, “Хүннү” хотын ахуйн бохир ус, цэвэрлэх байгууламжийн төсөлд 10 тэрбум төгрөг, “Эмээлт” эко аж үйлдвэрийн паркийн дулааны цахилгаан станц, бохир ус цэвэрлэх байгууламжийн ажилд 30 тэрбум төгрөгийг тодотголоор нэмжээ.
-ХОТЫН ДАРГА Х.НЯМБААТАР УЛААНБААТАР ХОТЫГ 14 ДАГУУЛ ХОТТОЙГООР ШИНЭЧЛЭН ЗОХИОН БАЙГУУЛАХААР ТӨЛӨВЛӨЖ, 56 ТЭРБУМ ТӨГРӨГ ТӨСӨВЛӨСӨН БАЙНА-
Үүгээр ч зогсохгүй, хотын дарга Х.Нямбаатар хот тосгоны эрхзүйн байдлын тухай хууль, Нийслэл Улаанбаатар хотыг 14 хоттойгоор шинэчлэн зохион байгуулахтай холбогдуулан Улаанбаатар хотын 2040 он хүртэлх хөгжлийн ерөнхий төлөвлөгөөг хэрэгжүүлэх, дагуул хотыг хөгжүүлэх хэсэгчилсэн ерөнхий төлөвлөгөө боловсруулах ажлын төсөвт өртгийг 56 тэрбум болгон нэмэгдүүлэхээр төсвийн тодотголын төсөвт тусгасан байв.
