"Монголын хөлбөмбөгийн холбооны орчинд үүсээд буй асуудлыг судлах түр хороо"-оос өнөөдөр /2025.02.21/ мэдэгдэл хийлээ.
Тэдний төлөөлөл ярихдаа, “Монголын хөлбөмбөгийн холбоо 1997 онд Азийн хөлбөмбөгийн холбооны гишүүн болсон. Тэр үеэс олон улсын байгууллагуудаас санхүүжилт орж ирдэг байсан. Энэ бүхэнд маш их хардлага байдаг байсан. Өнөөдрийг хүртэл энэ санхүүжилтийг банкны хуулгаар баримтжуулж гаргаж ирж байгаагүй. Хөлбөмбөгийн холбооны орчинд үүсээд буй асуудлыг судлах түр хорооноос эцсийн баримт болох дансны хуулгануудтай танилцаж үзлээ. Олон улсын хөлбөмбөгийн холбооны гүйлгээний утгыг харахад “Хурлын урамшуулал” гээд хөлбөмбөгийн холбооны удирдлагуудад 1000, 1000 доллар шилжүүлчихсэн байх жишээтэй.
Хөлбөмбөгийн холбооны ерөнхий нарийн бичгийн даргаар ажиллаж байсан хүн маань “Маркетингийн урамшуулал” нэрийдлээр өөрийнхөө данс руу асар олон удаагийн давтамжтай мөнгө шилжүүлсэн.
Магадгүй өөрийн төрсөн дүү юм уу эгч байх магадлалтай хүний данс руу “Маркетингийн урамшуулал” нэртэй мөнгө шилжүүлсэн байна. Бид эдгээр баримтыг өнөөдөр нэгтгэж байна. Даваа гарагт хөлбөмбөгийн холбооны зөвлөл хуралдана. Хурал дээр бид баримтуудыг нэгтгэж танилцуулна. Шаардлагатай бол аудит болон цагдаа шүүхийн байгууллагаар шалгуулна” гэсэн юм.
