Манай улсад сагсан бөмбөгийн спорт харьцангуй хөгжиж, монгол хүүхэд, залуучууд дэлхийн түвшинд гарч тоглох боломж бүрэн нээгджээ. Сагсан бөмбөгийн өнөөгийн хөгжлийг Т.Санчир, Б.Билгүүн нараар төсөөлдөг. Харин одоо тэднийг залгамжлах хүчтэй залуу халаа гарч ирж байгааг сагсан бөмбөгийг шимтэн үзэгчид харан суугаа биз ээ. Шинээр хүч түрэн гарч ирж буй тамирчдын нэг бол Э.Баярт-Эрдэнэ гэх хүү.
Дундоговь аймагт болсон хүүхдийн лигийн үеэр түүний цагираган дээрээс довтолсон үзүүлбэр, самбар хагалсан мөч хүн бүрийг бахдуулж, бас гайхашруулав. Шинэ залуу тоглогч учир түүнийг "хэн юм бол, хаанаас ийм сайн хүүхэд гараад ирэв" гэхчилэн асуултууд хөвөрлөө. Иймд бид сагсан бөмбөгийн дээд лигийн "SG Apes" багийн рүүки тоглогч Э.Баярт-Эрдэнэтэй ярилцлаа.
ВИДЕО:
-"ГЭР БҮЛИЙНХЭН МААНЬ БҮГД САГСАН БӨМБӨГ ТОГЛОДОГ БАЙСАН УЧРААС БАГААСАА ЭНЭ СПОРТОД ХАЙРТАЙ БОЛСОН"-
Э.Баярт-Эрдэнэ өдгөө 19-н настай. Түүний гэр бүлийнхэн бүгд сагсчид байжээ. Тэрбээр гэр бүлээсээ л сагс тоглохыг харж өссөн учраас эргэлт буцалтгүйгээр энэ спортод шунан дурласан байна. Түүний аавыг А.Эрдэнэбаяр гэдэг бөгөөд “Алтайн бүргэдүүд” багийн тамирчин аж.
Мөн Э.Баярт-Эрдэнийн хувьд энэ жил “SG Apes” багт шинээр орсон. Уг багт тоглохоос өмнө тэр өсвөрийн “Мазаалай” клубт тоглож байсан бөгөөд олон ч гадаад, дотоодын тэмцээнд орж, амжилт гаргажээ. Өнгөрсөн зун л гэхэд Америкт бэлтгэл хийж чадвараа сайжруулаад ирсэн байна. Тодруулбал, үсрэлт, тэсрэлт болон хөлийн хурд, шидэлт, залалт зэрэг хувь хүний ур чадварын бэлтгэлийг тэнд хийж байгаад иржээ. Түүний анх “SG Apes” багт орсон түүхийг сөхвөл багийнхаа Э.Тулга ахаасаа “Монголд очоод ямар нэгэн бэлтгэл хийх боломж бий юу. Хэрвээ боломж байгаа бол “SG Apes” багтай хамтраад бэлтгэл хиймээр байна” гэж асууснаар энэ багт нэгджээ.
Түүнийг цагираган дээрээс тохолт хийж, хоёр ч удаа самбар хагалсан гэдгээр нь хүмүүс сайн мэддэг болоод буй. Уг явдал нь Дорноговь аймагт болсон хүүхдийн лигийн бүх оддын тоглолтын цагираган дээрээс довтлох тэмцээний үеэр болсон явдал. Тэрбээр эхнийхээ самбарыг хагалаад шоконд орсон байхдаа финалын үзүүлбэр үзүүлэхээр болж, ахиад нэг самбар хагалчихсан.
Тухайн үед хүмүүсээс айсандаа гарч гүйгээд, буцаж орж ирээд ордонд байсан бүх хүмүүсээс уучлалт гуйсан гэнэ.
Энэ талаараа тэрбээр, "Самбар хагалах үед өнцөг нь таарсан л байх. Угаасаа ямар ч шилийг төмрөөр цохиход хагарна. Цагираг нь пүрштэй байдаг учраас татаад тавихад л харваад хагалсан гэж бодож байгаа. Түүнээс биш би нэг их хүчтэйдээ ч биш байх” хэмээн ярьсан юм.
-"ГАДААДАД ТОГЛОЖ, ӨНЛӨР ТҮВШНИЙ ТОГЛОГЧ БОЛОХ ХҮСЭЛТЭЙ"-
Э.Баяр-Эрдэнийн хувьд сагсны гараагаа гэрийнхээ гадаах сагсны шийтнээс эхэлжээ. Тэрбээр дүүгийнхээ бөмбөгийг авч шийтэн дээр очоод чадахгүй байсан ч тохолт хийх гэж зүтгэсээр нэг мэдэхэд чаддаг болсон гэнэ. Мөн түүний хувьд Жералд Грийн гэх тамирчнаас үлгэр дуурайлал авч, биширч явдаг бөгөөд NBA-гийн бүх оддын тоглолт болон гудамжны тохогч нарыг хараад аль болох өөрөө оролдож үзсээр суржээ.
Орчин үед өндөр нуруутай, сагс тоглодог хүүхдүүд олширсон бөгөөд Э.Баярт-Эрдэнийн хувьд бусдаас онцгойрох зүйл нь мэдээж тохолт. Гэхдээ дан ганц тохолтоороо хол явахгүй гэдгийг тэр мэднэ. Гэсэн хэдий ч жинхэнэ галзуу тохогч болно гэж боддог талаараа ярьсан юм. Угаасаа довтолсон ч тохсон ч хоёр л оноо авна шүү дээ.
Тохолт ч гэлтгүй саган бөмбөг тэр дундаа цагираган дээрээс довтлоход нэг их өндөр байх шаардлагагүй гэнэ. Энэ жил тэрбээр “SG Apes” багт нэгдсэн. Энэ талаараа ярихдаа тэр "Зурагтаар л үздэг хүмүүстэйгээ одоо нэг талбайд тоглох нь гайхалтай гоё мэдрэмж. Би хөгжлийн лигээсээ л дөнгөж орж ирсэн тамирчин. Анхныхаа тоглолт дээр таван алдаа хийгээд суусан. Тэгэхээр илүү сайн байж, хичээх хэрэгтэй байна.
Сагсан бөмбөгийн зарчим гэж нэг зүйл бий. Хэний хүүхэд байх нь хамаагүй. Рүүки тамирчин бол ах нартаа тусална. Сандлыг нь зөөнө. Хүндэлнэ” гэсэн юм.
Э.Баярт-Эрдэнэ одоогийн байдлаар Ш.Энхийн-Одоос үлгэр дуурайлал хамгийн их авдаг бөгөөд Монгол тоглогч нар Америкт өндөр түвшинд тоглох нь гоё санагддаг гэнэ. Тэрбээр лигтээ илүү удаан тоглох эс бөгөөс гадаадад тоглохыг хүсдэг бөгөөд гадаадад маш сайн сурж, илүү өндөр түвшний тамирчин болно гэж боддогоо аж.
