“Монголын морин тойргуулга ойрын зайн уралдаан уяачдын холбоо” ТББ-аас мэргэжлийн морин спортыг хөгжүүлэх зорилгоор 1700 метрт анхны ойрын зайн хурдан морины уралдааныг зохион байгуулах талаар өнөөдөр /2025.02.19/ мэдээлэл өглөө.
ВИДЕО:
-18 НАСАНД ХҮРСЭН МЭРГЭЖЛИЙН МОРЬ УНААЧ 20 ЗАЛУУГ БЭЛТГЭЖ, АЖЛЫН БАЙРААР ХАНГАСАН-
“Монголын морин тойргуулга ойрын зайн уралдаан уяачдын холбоо”-ны тэргүүн н.Гантулга ярихдаа, "Манай холбоо Монгол Улсын нутаг дэвсгэрт импортоор орж ирж буй цэвэр цусны адуу түүний төлийг бүртгэн гэрчилгээ олгосноор Монгол улсад морин тойруулга, ойрын зайн уралдааныг үүсгэн хөгжүүлэх үндэс суурийг тавьж, мэргэжлийн жоке бэлтгэх сургалт зохион явуулах, олон улсын жишигт нийцсэн морин тойруулга , ойрын зайн морин уралдаан болон сонгодог морин спортыг хөгжүүлэх зорилготой 2021 онд анх үүсгэн байгуулагдсан. Бид энэ зорилгоо биелүүлэхийн тулд маш олон ажлыг төлөвлөн хийж байна. Тухайлбал,
Хан монгол морин цэргийн хамт олонтой хамтраад Монгол Улсад анх удаа жоке буюу 18 насанд хүрсэн мэргэжлийн морь унаач 20 залууг бэлтгэж, ажлын байраар хангаад байна.
Мөн 2022 оны гуравдугаар сарын 6-ны өдөр ойрын зайн 4500 метрийн уралдааныг анх удаа мэргэжлийн 18 насанд хүрсэн хүнээр унуулж амжилттай зохион байгуулсан.
-МОНГОЛ НААДАМ ЦОГЦОЛБОРТ 12 МЯНГАН ГА ТАЛБАЙД МОРИН ТОЙРУУЛГА БАРИХААР ТӨЛӨВЛӨЛТ ХИЙСЭН Ч ЗАСГИЙН ГАЗРААС ЯМАР Ч АЖИЛ ХИЙЖ ЭХЛЭЭГҮЙ БАЙНА-
Түүнчлэн, Солонгос улсын Жэжү хотын морин тойруулга, АНУ-ын Кентаки мужийн морин тойруулга Япон, Хятад улсуудын морин тойруулгаас туршлага судалж, хамтран ажиллахаар бэлтгэл ажлаа хангаад байна. Мөн Хүй долоон худаг дахь Монгол наадам цогцолборт 12 мянган га талбайд морин тойруулга барихаар төлөвлөлт хийсэн боловч Засгийн газраас ямар ч ажил хийж эхлээгүй байна. Бид Монгол Улсад анх удаа үржлийн адууны үзэсгэлэн дуудлага худалдааг олон улсын жишигт нийцүүлэн амжилттай зохион байгуулсан” гэв.
-МОНГОЛ УЛСАД ОЙРЫН ЗАЙН МОРИН УРАЛДААНЫ ТУХАЙ ХУУЛИЙН ЗОХИЦУУЛАЛТ БАЙХГҮЙ-
Монгол Улсад морин тойруулга, ойрын зайн уралдааныг хөгжүүлэхэд хэд хэдэн хүндрэлтэй асуудал гардаг. Нэгдүгээрт хууль эрхзүйн орчин байхгүй байна. Морин уралдааны, ойрын зайн морин уралдааны тухай хуулийн зохицуулалт байхгүй учраас Хууль зүй дотоод хэргийн яам энэ хуулийг нэн яаралтай санаачлан батлуулах хэрэгтэй байна. 2023 онд одоогийн хотын дарга Х.Нямбаатар Хууль зүй дотоод хэргийн яамны сайд байхдаа “Бооцоот морин уралдаан, сонгодог морин уралдааны хууль,тааварт тоглоомын хууль, казиногийн хуулийг санаачлаад УИХ-д өргөн барьсан”. Бооцоот морин уралдааны хууль казиногийн хуультай хамт явж байгаа болохоор ард түмний эсэргүүцэлтэй тулгарч, батлагдаагүй. Иймээс бооцоот морин уралдааны хуулийг казиногийн хуулиас салгаж яаралтай батлуулах хэрэгтэй байна" гэв.
