Ази тивийн аварга шалгаруулах тэмцээнийг Монгол Улсад өнгөрсөн оны долдугаар сард зохион байгуулсан. Уг тэмцээний үеэр Дэлхийн допингийн эсрэг байгууллага болон Олон улсын бодибилдинг фитнесийн холбооны холбогдох мэргэжилтнүүд хамтран түүврийн аргаар тэргүүн байранд шалгарсан 20 тамирчинаас допингийн шинжилгээ авахад монгол дөрвөн тамирчнаас допинг илэрсэн гэж мэдээлсэн.
Энэ асуудалтай холбогдуулан Монголын бодибилдинг, фитнесийн хөгжлийн холбооноос мэдэгдэл гаргажээ. Уг мэдэгдэл, "Ойрын хугацаанд допингийн мэдэгдэлтэй холбоотой асуудлаар олон нийтийг бухимдуулж байгаад холбооны зүгээс харамсаж байна. Монголын Бодибилдинг, фитнессийн хөгжлийн холбоо нь өөрт хамаарах хүрээнд та бүхнийг ташаа мэдээлэлд автахаас урьдчилан сэргийлэх зорилгоор энэхүү мэдэгдлийг хүргэж байна.
Мөн Монголын Үндэсний Допингийн Эсрэг байгууллага нь өөрсдийн хүлээсэн үүргийн дагуу Дэлхийн допингийн эсрэг байгуулага (WADA)-тай холбогдож “Б” сорьцыг шинжлүүлэх хугацааг сунгах зөвшөөрөл авсан учир холбогдох тамирчид ойрын хугацаанд Олон Улсын Бодибилдинг Фитнессийн Холбоо (IFBB)-той холбогдож “Б” сорьцоо шинжлүүлэх нь нээлттэй болно" гэжээ.
