Улаанбурханы өвчлөл бүртгэгдэж буй улс орнуудаар аялсан өгүүлэмжтэй уг халдварын сэжигтэй нэг тохиолдлыг тусгаарлан, оношилгоо, эмчилгээнд хамруулж, тандалт судалгаа хийж байгаа талаар Халдварт өвчин судлалын үндэсний төвөөс мэдээллээ.
Тодруулбал, дэлхий дахинд 2025 оны нэгдүгээр сарын байдлаар улаанбурхан өвчний 3,106 тохиолдол бүртгэгджээ. Тухайлбал, Монгол Улсын иргэд ихээр зорчдог Тайланд улсад 103 тохиолдол бүртгэгдэн дэгдэлт болж байгаа аж. Иймд иргэдийг гадаад улс оронд зорчихдоо улаанбурхан өвчний эсрэг вакцинд хамрагдахыг зөвлөлөө.
Иргэд ХӨСҮТ-ийн сайн дурын дархлаажуулалтын кабинетад хандан вакцинд хамрагдах боломжтой. Үндэсний товлолын дагуу улаанбурхан, гахай хавдар, улаануудын эсрэг дархлаажуулалтад хамрагдах (9 сартай, 2 настай) хүүхдүүд өрхийн эрүүл мэндийн төв, сумын эрүүл мэндийн төвүүддээ хандан үнэ төлбөргүй хамрагдах боломжтой хэмээн мэдээллээ.
