PGL-ээс зохиож буй CS2-ын 1,250,000 ам.долларын шагналын сан бүхий "PGL Cluj-Napoca 2025" тэмцээн хоёрдугаар сарын 14-23-ны хооронд Румын улсын Клаж-Напока болон Бухарест хотуудад болно.
Тэмцээнд оролцох 16 багийг дэлхийн чансааны дарааллаар урьсан бөгөөд Монголын "The MongolZ" оролцохоор болсон юм. Монгол залуусын эхний тоглолт өнөөдөр 22:00 цагаас Хойд Америкийн "Complexity" багийн эсрэг байх аж. Тэмцээний хэсгийн шат швейцар системээр болох ба хамгийн түрүүлж гурав хожсон найман баг playoffs шатанд шалгарна. Финалын тоглолтоос бусад бүх тоглолт Bo3 журмаар болно. Ялагч нь 400 мянган ам.доллар авах бол ердөө оролцсоныхоо төлөө 12,500 ам.долларыг халааслах уг тэмцээнд монгол дасгалжуулагчтай Австралийн "FlyQuest" баг мөн оролцоно.
