Өмнөд Солонгосын далайн тээврийн компанийн PanStar Acro чингэлэг тээвэрлэгч хөлөг онгоц Хойд тэнгисийн замаар арилжааны туршилтын тээвэрлэлт хийснийхээ дараа Бусан боомтод буцаж ирлээ.
Туршилтын рейсийн дүнгээр Арктикийн чиглэлд байнгын тээвэрлэлт хийх боломжийг судлах юм. “Энэ бол маш чухал төсөл. Ялангуяа чиглэлийн яамд, агентлагууд туршилтын рейсийн үр дүнг бүрэн хэмжээгээр судалсны дараа бид дунд ба урт хугацаанд байнгын тээвэрлэлт хийх боломжийг авч хэлэлцэнэ” гэж ОХУ-д суугаа Өмнөд Солонгосын элчин сайд Ли Сок Пэ мэдэгдэв. Түүний хэлснээр, Өмнөд Солонгосын тал Арктикийн маршрутыг ихэд сонирхож байгаа бөгөөд Хойд тэнгисээр хийсэн туршилтын рейс нь тус улсын засгийн газрын чухал зорилтуудын нэг болж байна. Эргэн сануулахад, чингэлэг тээвэрлэгч PanStar Acro хөлөг онгоц 8 дугаар сарын 22-нд Бусан боомтоос гарч, Арктикаар дамжин Европт хүрсэн бөгөөд Ази-Европын хооронд арилжааны тээвэрлэлт хийхэд Хойд тэнгисийн зам хэр тохиромжтой гэдгийг тодорхойлох зорилготой байв. Арктикаар дамжих тэнгисийн зам нь Суэцийн сувгаар нэвтэрдэг замаас даруй долоон мянган км-ээр дөт юм. Өмнөд Солонгосын шинжээчдийн тооцоолсноор, энэ нь ачаа тээвэрлэх хугацааг 10 орчим хоногоор богиносгох бөгөөд 40-45 хоног байх ажээ.
