Өмнөд Солонгосын алдарт дуучин, реппер Psy /жинхэнэ нэр нь Пак Жэ Санг/ эмнэлгийн хууль тогтоомж зөрчсөн гэх үндэслэлээр Сөүл хотын цагдаагийн газарт шалгагдаж эхэлжээ. Түүнийг өөрөө биечлэн үзүүлэхийн оронд гуравдагч этгээдээр дамжуулан Xanax, Stilnox зэрэг сэтгэцэд нөлөөт эм авч байсан байж болзошгүй гэж үзэж байгаа аж.
БНСУ-ын цагдаагийн газрын мэдээлснээр, "Пак Жэ Санг 2022 оноос эхлэн саяхныг хүртэл Сөүл хотын нэгэн их сургуулийн эмнэлгээс эм авч ирсэн бөгөөд эмч нар түүний менежертэй хууль бусаар харилцаж, Пак Жэ Сангтай нүүр тулсан үзлэг хийгээгүй байж магадгүй байгаа аж.
Xanax болон Stilnox нь нойргүйдэл, түгшүүр, сэтгэлийн хямралыг эмчлэхэд хэрэглэгддэг ч донтолт үүсгэх өндөр эрсдэлтэй тул эмчийн шууд үзлэг, жорын дагуу хэрэглэх ёстой ажээ.
Гэвч Пак Жэ Сангийн эмч түүнийг алсаас эмчилсэн хэмээн мэдүүлсэн ч цагдаагийнхан энэ нь хууль зөрчсөн байж болзошгүй гэж үзэж байгаа аж. Харин дуучны агентлаг өчигдөр /2025.08.28/ мэдэгдэл гаргаж, түүний архаг нойргүйдлийн оноштой бөгөөд эмчийн зааврын дагуу эм хэрэглэдгийг тайлбарласан байна. Мөн “зарим тохиолдолд түүний өмнөөс гуравдагч этгээд эм авч байсан нь алдаа байсан” гэжээ.
Эх сурвалж: Yonhap
.jpg)
