УИХ-ын дарга асан, Ерөнхийлөгчийн Тамгын газрын дарга асан З.Энхболд, УИХ-ын гишүүн, Зам тээврийн сайд асан Б.Энх-Амгалан нарт холбогдох эрүүгийн хэргийн давж заалдах шатны шүүх хурал өчигдөр /2025.04.30/ Нийслэлийн Эрүүгийн хэргийн давж заалдах шатны шүүхэд болсон билээ. Шүүхээс З.Энхболдыг цагаатгаж, Б.Энх-Амгаланд хоёр жилийн хорих ял оноосон анхан шатны шүүхийн шийтгэх тогтоолыг хүчингүй болгосон.
Тэгвэл давж заалдах шатны шүүхийн магадлалаар анхан шатны шүүхийн шийтгэх тогтоолыг хүчингүй болгосон ч эрүүл мэнд нь хүндрээд байгаа гэх Зам тээврийн сайд асан Б.Энх-Амгаланг сулласангүй.
Тодруулбал, Нийслэлийн Эрүүгийн хэргийн Давж заалдах шатны шүүхээс З.Энхболд, Б.Энх-Амгалан нарт урьд авсан таслан сэргийлэх арга хэмжээг хэвээр үлдээж шийдвэрлэсэн байна. Товчхондоо Б.Энх-Амгалан цагдан хориотой, З.Энхболд хувийн баталгаа гаргах таслан сэргийлэх арга хэмжээтэйгээ үлдэв. Ташрамд өгүүлэхэд өчигдөр /2025.04.30/ болсон давж заалдах шатны шүүх хурлын үеэр Б.Энх-Амгалангийн өмгөөлөгч Д.Батсүх "Миний үйлчлүүлэгч Б.Энх-Амгалан болон миний хувьд шүүх хурлаа хурдан хийлгэх хүсэлтэй байна. Учир нь миний үйлчлүүлэгч гурван сарын хугацаанд цагдан хоригдсон. Эрүүл мэндийн нөхцөл байдал нь хүндэрсэн байгаа" гэдгийг тодотгож байсан юм.
