Мэргэжлийн сүмо бөхийн Хацу башё өнөөдөр /2025.01.26/ өндөрлөлөө. Сүүлийн өдрийн барилдааны эцсийн мөчид 3 бөхийн хооронд нэмэлт барилдаан гарсан юм. Нэмэлт барилдаанд Хошёорюү С.Бямбасүрэн адил даваа унаатай байсан Кинбозан, Охо нарыг давснаар 12 даваа 3 унаатайгаар түрүүлж, ёкозүна цол хүртэх болзлоо хангалаа.
Энэ талаар Хошёорюү С.Бямбасүрэнгийн авга ах, Хотын дарга асан Д.Сумъяабазар "Миний ах Д.Сугаррагчаагийн хүү, авга дүү Хошёорюү С.Бямбасүрэн мэргэжлийн сүмогийн Хацу башё-д өнөөдөр түрүүлж, хоёр дахь удаагаа түрүү бөхөөр шалгарлаа. Өнөөдөр чи маш сайн байлаа. Огшиж үзлээ. Ёкозуна цолны болзлоо хангасан дүүдээ халуун баяр хүргэе. Улам их амжилтыг хүсье. Ирэх гуравдугаар сард авга дүү С.Бямбасүрэн Ёкозуна цолтойгоор барилдаж, дүү Д.Сэржбүдээгийн хүү, авга дүү С.Лувсангомбо маань мэргэжлийн сумод барилдаж эхлэх нь ээ" хэмээн сэтгэгдлээ хуваалцжээ.
