Мэргэжлийн боксын рингэнд таван тулаан хийхдээ бүгдэд нь ялалт байгуулсан Монголын боксчин Х.Энхмандах WBA холбооны шинэчлэгдсэн чансаагаар жиндээ 12 дугаарт жагссан талаар Монцамэ агентлаг мэдээлжээ.
Flyweight буюу 51 кг-ын чансааны тэргүүн байрт ямар нэг тамирчин бичигдээгүй бөгөөд дэд байрт Пуэрто-Рикогийн боксчин, мэргэжилд 7-0 амжилттай яваа Янкейл Ривера эрэмбэлэгдсэн байна. Манай тамирчны хувьд ойрын 1-2 тулаанд ялалт байгуулбал дэлхийн аваргын бүсний төлөө өрсөлдөх боломжтой. Тэрбээр өнгөрсөн сарын 6-нд Америкийн боксчин Карлон Жонсоныг нэгдүгээр үеийн хоёр дахь минутад хүнд цохилтоор буулган авчээ.
