Томуу, томуу төст өвчнөөр өвчилсөн бага насны хүүхдүүдийн талаарх тоон мэдээлэл болон хэрхэн урьдчилан сэргийлэх талаар Эх нярай, эрүүл мэндийн төвөөс өнөөдөр /2024.12.20/ мэдээлэл хийлээ.
Эх нярай, эмэгтэйчүүдийн үндэсний төвийн тасгийн эрхлэгч Т.Хаш-Эрдэнэ, “Манай эмнэлгийн эрчимт эмчилгээний тасагт 19 хүүхэд хүнд байдалтай эмчлэгдэж байна. Энэ нь томуугийн нөхцөл байдал хүүхдүүдэд илүү хүнд хэлбэрээр явагдаж буйг илэрхийлж байгаа юм. Томуугийн өвчнөөс урьдчилан сэргийлэхэд дан ганц эмч ажилтан гэлтгүйгээр иргэд эцэг эхчүүд анхаарч, заавар зөвлөмж дагах хэрэгтэй байна. Томуугаас сэргийлэхэд үндсэн гурван арга бий.
- Нийтлэг авах арга хэмжээ: Эцэг эх, асран хамгаалагчид өөрсдөө бүрэн хийх боломжтой арга хэмжээнүүд байдаг. Үүнд гарын ариун цэврийг тогмтол сахиулах, олон нийтийн газраар явахдаа амны хаалт тогтмол зүүх, хүүхдийн хооллолт дээр анхаарах, сахар чихрийн хэрэглээг багасгах шаардлагатай.
- Томуугаас урьдчилан сэргийлэх вакцинжуулалтад хамрагдах
- Эмийн өвөрмөц эмчилгээ: Нарийн мэргэжлийн эмчийн заавраар хийлгэдэг.
Бид цэцэрлэгийн насны 200 гаруй хүүхдэд үзлэг хийхэд 10 орчим хүүхэд л шүд нь эрүүл байсан. Энэ нь чихрийн хэрэглээ хэт их байгааг харуулж байгаа юм. Иймд эцэг эхчүүд хүүхдээ зөв хооллож, дархлааг нь дэмжих хэрэгтэй байна. Өнгөрсөн саруудад 6-17 насны хүүхдүүд илүү хүнд хэлбэрийн томуу, хатгай хүрч байсан бол өнгөрсөн долоо хоногийн мэдээгээр 0-5 хүртэлх насны хүүхдүүд илүү хүнд хэлбэрээр өвдөж байна. Мөн олон нийтийн сүлжэээгээр явж буй мэдээллийг хүүхэд дээрээ туршихгүй байхыг хүсье" гэлээ.
