Америкчууд бямба гаргийн орой Парисын Олимпын наадмын эрэгтэйчүүдийн сагсан бөмбөг, эмэгтэйчүүдийн хөл бөмбөгийн төрөлд тус тус алтан медаль хүртлээ. Ингэснээр Америкийн эрэгтэй сагсанбөмбөгчид сүүлийн таван Олимп дараалан алтан медаль хүртэж, нийт 17 алтан медалийн эзэд болжээ.
Америкийн шигшээ баг “Берси Арена” цогцолборт болсон тоглолтод Францыг 98-87 харьцаагаар буулган авсан бөгөөд Стефен Көрри 24 оноо авснаар багаа тэргүүллээ. Францын шигшээ багийн тоглогч Виктор Вембаньяама 26 оноо авсан боловч энэ нь зохион байгуулагч орон энэ төрөлд анхны алтан медалиа хүртэхэд хангалттай байсангүй. Финалын тоглолтын үеэр С.Көрри сүүлийн гурван минутад дөрвөн удаа гурван онооны шидэлтийг амжилттай гүйцэтгэжээ. Тоглолт дуусахад ердөө 35 секунд дутуу байхад онооны харьцааг 96-87 болгож чадсан тэрбээр алгаа хавсран нүүрэндээ нааж “харьж унт” гэсэн дохио зангаа үзүүлсэн байна.
АНУ-ын дасгалжуулагч Стив Керр, “Мөнгөн медаль авбал хөгжөөн дэмжигчид маань ичгэвтэр байдалд орох дэлхийн цорын ганц баг манайх байж магадгүй гэж бодож байна. Энэ бол бидэнд тулгардаг дарамт юм. Гэхдээ манай тоглогчид, та нар Стефийг харсан шүү дээ, тэд дарамтанд дуртай. Тэд гайхалтай байлаа” хэмээн ярьжээ. Олимпын сагсан бөмбөгийн түүхэнд эрэгтэйчүүдийн төрлөөс дөрвөн алтан медаль хүртсэн анхны тамирчин болсон Кевин Дюрант энэ тоглолтын үеэр 15 оноо авсан бол гурван алтан медалийн эзэн болсон Леброн Жэймс 14 оноо авлаа.
Харин 1948, 2000, 2020 онуудад америкчуудтай финалд шалгарч байсан Францын хувьд Олимпын дөрөв дэх мөнгөн медалиа хүртлээ. Энэ жил НБА-гийн Шилдэг шинэ тоглогч болсон В.Вембаньяама америкчуудыг баяраа тэмдэглэх үеэр нулимс унагажээ. Хожим нь К.Дюрант түүнийг тэвэрч, хэдэн минут ярилцсан байна. Мөн бямба гарагт АНУ-ын эмэгтэй хөл бөмбөгийн баг хоёрдугаар хагаст Мэллори Свонсоны оруулсан гоолоор Бразилын шигшээг 1:0-ийн харьцаагаар буулган авснаар Олимпын тав дахь алтан медалиа хүртлээ. Америк бүсгүйчүүдийн хувьд энэ бол Лондоны Олимпоос хойших анхны алтан медаль байв.
