ДАШТ-ий хүрэл медальт, Азийн наадмын болон Азийн аварга, ОУХМ, гавьяат тамирчин Э.Цэндбаатар энэ оны нэгдүгээр сард гавьяатынхаа найрыг нижгэр тэмдэглэсэн билээ.
Энэ үеэр Архангай аймгийн нутгийн зөвлөл болон тус аймгаас УИХ-д сонгогдсон гишүүд болох Ж.Мөнхбат, Ё.Баатарбилэг, Г.Тэмүүлэн нар шинэхэн гавьяатад "Сүзүки" маркын автомашин бэлэглэж буйгаа мэдэгдсэн нь олны сайшаалыг хүртэж байсан. Тухайн үед дээрх гишүүд "Э.Цэндбаатарт бэлэглэх "Сүзүки" маркын автомашин Баянзүрх дүүрэгт түгжрээд ирж байгаа" гэдгийг хэлж, түүнд баяр хүргэж байсан юм. Гэтэл гишүүдийн бэлэг өнөөг хүртэл эзэндээ хүрээгүй байгаа аж. Ер нь аливаа тэмцээн уралдаанд амжилт гаргасан тамирчдад улстөрчид элдэв зүйл амлаж, PR хийдэг ч нижир дээрээ өгөхгүй энэ мэтээр "мурьдаг" явдал их байдгийн нэгэн жишээ энэ болжээ.
