Казах курес бөхийн насанд хүрэгчдийн Азийн аварга шалгаруулах тэмцээн энэ сарын 17-18-нд Монгол Улсад анх удаа болно.
Монгол бөхийн өргөөнд зохион байгуулах тус тэмцээнийг эх орондоо зохион байгуулахын төлөө манай улс Узбекистан, Киргизтэй өрсөлджээ. Улмаар Олон улсын казах курес бөхийн холбооныхон өнгөрсөн тавдугаар сард хуралдан, Азийн АШТ-ий эрхийг Монголд олгосон байна. Олон улсын казах курес бөхийн холбоо, Азийн казах курес бөхийн холбоотой хамтран зохион байгуулах тэмцээнд 11 орны 120 гаруй тамирчин зодоглох аж.
Азийн АШТ-д Монголоос зохион байгуулагч орны давуу эрх эдлэн жин тус бүрт хоёр, үнэмлэхүй жингийн тамирчинтай нийлээд улсын начин Б.Серик тэргүүтэй 17 бөх хүч сорино. Тэд ОУХМ Ч.Болдбаатарын удирдлагад бэлтгэлээ базааж буй юм байна.
Азийн АШТ-ий жин тус бүрт түрүүлсэн бөхийг нэг мянга, үзүүрлэсэн тамирчныг 500, хүрэл медаль хүртсэнийг нь 300 ам.доллароор шагнана. Харин үнэмлэхүй жинд түрүүлсэн бөх гурван мянган ам.долларын шагнал хүртэнэ. МҮОНРТ, SPS телевизээр шууд дамжуулах Азийн АШТ-д өндөр амжилт үзүүлсэн Монголын бөхчүүдээс ДАШТ-д зодоглох тамирчдыг сонгоно.
Монгол тамирчид өнгөрсөн жил Азийн АШТ зодоглохдоо бүх жинд медаль (гурван алт, гурван мөнгө, хоёр хүрэл) хүртсэн. Эх орондоо түүнийгээ давтах, ахиулах том даалгавартай өрсөлдөнө.
Тэмцээний тасалбар 1500 ширхэг хэвлэгдсэн, 10 мянган төгрөгийн үнэтэй байх ба Монгол бөхийн өргөө, Спортын төв ордны нэг давхарт байрлах “Yawara shop”-оос худалдан авах боломжтой аж. Тус Азийн АШТ-ий азтай үзэгчийг “Приус-30” маркийн автомашинаар шагнах юм байна.
Байгуулаад жил гаруй болж буй Азийн казах курес бөхийн холбооны ерөнхийлөгчөөр Хөдөлмөрийн баатар, Олимпийн хүрэл медальт, Дэлхийн аварга Х.Цагаанбаатар ажилладаг аж.
Казах курес бөхийн Азийн АШТ-д оролцох Монголын багийн бүрэлдэхүүн:
55 кг: Даваанямын Бөхчулуун, Амарсанаагийн Хатансайхан
60 кг: Пүрэвдагвын Алтанбагана, Батцэрэнгийн Энэбиш
66 кг: Батзаяагийн Эрдэнэбаяр, Болдын Самбууням
74 кг: Санжмятавын Баяртүвшин, Бат-Эрдэнийн Пүрэвдаваа
82 кг: Баянмөнхийн Гаажадамбa, Батмөнхийн Алтансүх
90 кг: Батнасангийн Тэнгис, Эрдэнэтогтохын Түмэннасан
100 кг: Дэлгэрийн Цэрэнням, Ганын Түвшинжаргал
100+ кг: Хутагийн Цогтгэрэл, Бередмуратын Серик
Үнэмлэхүй жин: Болдпүрэвийн Өнөржаргал
Багийн ахлагч: Г.Түвшинжаргал
Дасгалжуулагч: Ч.Болдбаатар
