АНУ-ын Ерөнхийлөгч Д.Трамп Венесуэлийн эрэг рүү олон мянган цэрэг, арав орчим тэнгисийн цэргийн хөлөг онгоц илгээсэн нь олон улсын анхааралд ороод байна. Үүний албан ёсны шалтгаан нь хар тамхины бүлэглэлүүдийн эсрэг тэмцэл гэж байгаа боловч Венесуэлийн дарангуйлагч Николас Мадурог баривчлах бэлтгэлтэй төстэй харагдаж байна гэжээ.
Венесуэлийн дарангуйлагч удирдагч Николас Мадуро АНУ Карибын тэнгисийн өмнөд хэсэгт цэргийн хүчээ эрс нэмэгдүүлснийг шүүмжилж, үүнийг улс орноо бүслэх үйлдэл гэж нэрлэжээ. Тодруулбал, Николас Мадурог өчигдөр /2025.08.29/ Каракас хотноо цэргүүдийн өмнө үг хэлэхдээ, “АНУ хэд хэдэн байлдааны хөлөг онгоц, цөмийн шумбагч онгоц, 4500 цэргийг Венесуэлийн эрэгт байрлуулсан нь НҮБ-ын дүрмийг зөрчсөн жинхэнэ дайсагнасан бүслэлт юм. Гэхдээ тэд хэзээ ч Венесуэлд довтлохгүй” гэжээ.
АНУ-ын мэдээлснээр тус бүс рүү “Сан Антонио”, “Иво Жима”, “Форт-Лодердейл” зэрэг шумбагч онгоц болон нийт долоон хөлөг онгоц илгээжээ. Мөн 4500 цэргийн 2200 нь тэнгисийн явган цэрэг байгаа аж. Мөн АНУ бүс нутагт P-8 төрлийн тагнуулын онгоцыг ашиглаж эхэлсэн гэжээ. АНУ-ын Ерөнхийлөгч Д.Трамп энэ ажиллагааг “хар тамхины бүлэглэлүүдийн эсрэг тэмцэл, цагаачлалыг хязгаарлах, АНУ-ын өмнөд хилийг хамгаалах өргөн хүрээний стратегийн нэг хэсэг” гэж тодорхойлсон юм.
Харин Венесуэлийн тал НҮБ-ын Ерөнхий нарийн бичгийн дарга Антонио Гутеррешид гомдол гаргаж, АНУ-ын ажиллагааг НҮБ-ын үндсэн дүрэм зөрчсөн үйлдэл гэж буруутгасан байна. Венесуэлийн байнгын төлөөлөгч Самуэль Монкадагийн хэлснээр, “Энэ бол тусгаар тогтносон улсад цэргийн хөндлөнгийн оролцоог зөвтгөх зорилготой асар том суртал ухуулга” гэжээ.
Тэгвэл АНУ-ын “Axios” хэвлэл цэргийн ийм хэмжээний хуримтлал зөвхөн хар тамхины эсрэг тэмцэлд зориулагдсан гэхэд эргэлзээтэй, харин Венесуэлд зэвсэгт мөргөлдөөн эхлэх дохио байж болзошгүй гэж үзжээ.
Цагаан ордны зарим эх сурвалж Венесуэлийн дэглэмийг өөрчлөх боломжийн талаар ярьж байгаа бөгөөд Николас Мадурог “хууль ёсны Ерөнхийлөгч гэхээсээ илүү хар тамхины бүлэглэлийн толгойлогч” гэж тодорхойлсон байна. АНУ-ын нэгэн албан тушаалтан энэ үйл явдлыг Панамын ерөнхийлөгч асан Мануэль Норьегаг 1989 онд баривчилсан ажиллагаатай зүйрлэж, “Нориегагийн давталт байж мэднэ” хэмээн дурджээ. АНУ өмнө нь Николас Мадурогийн мэдээллийг өгсөн хүнд олгох шагналыг 25 сая ам.доллараас 50 сая ам.доллар болгон нэмэгдүүлсэн юм.
Эх сурвалж: BBC
