Авто замыг хөгжүүлэх 2030 он хүртэлх мастер төлөвлөгөөнд багтсан дугуйн замыг шинээр тавих ажлын хүрээнд Яармаг- Зайсан- Маршалын гүүр гэсэн чиглэлд 52 км урттай дугуйн замыг барихаар болсон.
Эхний ээлжид Маршалын гүүрнээс Гачууртын Улиастайн гүүр хүртэл дугуйн зам зургаадугаар сарын 10-н гэхэд бэлэн болно гэдгийг Нийслэлийн Засаг дарга С.Амарсайхан хэллээ.
Авто замаас зайтай, тасралтгүй үргэлжлэх, аюулгүй, стандарт бүхий дугуйн зам хэрэгтэй байна гэх хүсэлтүүд иргэдийн зүгээс маш олон удаа ирж байсан учир дараах маршрутыг гаргажээ.
Таван шар – Саппоро
Саппоро – Баянбүрд
МУБИС – Зүүн 4 зам
Зүүн 4 зам – Офицеруудын ордон
Яармагийн гүүр – Маршалын гүүр - Зайсангийн гүүр – Скай Ресорт - Баянзүрхийн товчоо - Налайхын замтай тус тус холбосон дугуйн зам барина гэлээ.
Төв зам дагуу, автомашины замаас ангид, стандартын шаардлага хангасан дугуйн зам баригдаж байгаа гэдгийг дурдлаа. Жишээ нь, Маршалын гүүрнээс Гачууртын Улиастайн гүүр хүртэл дугуйн зам бүрэн гэрэлтүүлэгтэй, хоёр талдаа зогсоолтой, дундаа амралтын зогсоолтой 7.2 км урт үргэлжлэх дугуйн зам хийгдэж байгаа ба зургаадугаар сарын 10-ний өдөр гэхэд бэлэн болж, үлдсэн ажлуудыг цааш үргэлжлүүлэн хийнэ гэлээ.
