БНАСАУ-ын удирдагч Ким Жон Ун 20 хоногийн дараа анх удаа олны өмнө гарч ирсэн талаар Солонгосын төв цахилгаан мэдээний агентлаг /KCNA/ мэдээллээ.
“БНАСАУ-ын удирдагч бордооны үйлдвэрийг нээх ёслолын туузыг хайчиллаа” гэж “KCNA” агентлаг мэдээлжээ. Түүнийг баасан гарагт ирэхэд үйлдвэрт байсан бүх хүн “ура” хэмээн хашхирсан байна.
Ким Жон Ун дөрөвдүгээр сарын 12-ноос хойш олны өмнө харагдаагүйтэй холбогдуулан түүний биеийн байдлын талаар янз бүрийн таамаглал гарч эхэлсэн юм.
“KCNA” агентлагийн мэдээлснээр, Ким Жон Ун БНАСАУ-ын хэд хэдэн өндөр албан тушаалтны хамтаар дээрх арга хэмжээнд оролцжээ. Тэдний дунд түүний дүү охин Ким Ё Жон байжээ.
“KCNA” агентлаг юу гэж мэдээлэв?
"БНАСАУ-ын удирдагч Пёньян хотоос хойд зүгт оршдог бүс нутагт болсон үйлдвэрийн нээлтэд оролцож, тууз хайчиллаа. Уг үйл ажиллагаанд оролцсон хүмүүс хөгжил цэцэглэлтийн төлөө бүх ард түмнээ удирдан залж буй удирдагчдаа халуун баяр хүргэлээ” гэж “KCNA” агентлагийн мэдээнд тэмдэглэжээ.
Ким Жон Ун үйлдвэрийн үйлдвэрлэлийн системд сэтгэл хангалуун байгаагаа илэрхийлээд, энэхүү үйлдвэр БНАСАУ-ын химийн үйлдвэр болон хүнсний үйлдвэрлэлд ихээхэн хувь нэмэр оруулна гэж хэлсэн байна.
Түүний биеийн байдлын талаарх таамаглал хаанаас гарав?
Ким Жон Ун дөрөвдүгээр сарын 15-нд өвөө Ким Ир Сенийхээ мэндэлсний 108 жилийн ойн ёслолын арга хэмжээнд оролцоогүйгээс хойш түүний биеийг муудсан гэж таамаглаж эхэлжээ.
Энэхүү арга хэмжээ нь БНАСАУ-ын хамгийн том баяруудын нэг юм. Ким Жон Ун энэ өдөр өвөөгийнхөө бунханд хүндэтгэл үзүүлдэг. Тэрбээр 2011 оны сүүлээс төрийн эрхийг барьж эхэлснээсээ хойш энэ арга хэмжээг нэг ч удаа алгасаж байгаагүй.
БНАСАУ-аас дүрвэгчдийн хөтөлдөг цахим хуудсанд Ким Жон Уныг өвдсөн талаар мэдээлэл гарснаас хойш олон нийтийн хэвлэл мэдээллийн хэрэгслүүд энэ талаар мэдээлж эхэлсэн байна.
“Ким Жон Ун өнгөрсөн наймдугаар сараас хойш зүрх судасны өвчний улмаас шаналж байсан боловч Пекту ууланд олон удаа гарсны дараа өвчин нь улам сэдэрсэн” гэж нэрээ нууцалсан их сурвалжаас “Daily NK” цахим хуудсанд мэдээлжээ.
Үүний дараа олон улсын хэвлэл мэдээллийн хэрэгслүүдэд ийм мэдээ гарах болж, мэдээллийн агентлагууд энэ талаар нэн даруй мэдээлж эхэлсэн. Түүнчлэн Ким Жон Ун зүрхний мэс засалд орсны дараа биеийн байдал нь хүнд байна гэж АНУ-ын хэвлэлээр мэдээлснээс хойш улам дуулиантай болсон билээ.
АНУ-ын төлөөлөгчид Ким Жон Уныг ойрын үед “хараагүй” гэж АНУ-ын Төрийн нарийн бичгийн дарга Майк Помпео дөрөвдүгээр сарын 29-нд мэдээлсэн нь цуурхлыг улам даамжруулсан байна. Гэсэн хэдий ч БНСУ-ын Засгийн газар, БНХАУ-ын Тагнуулын газрын эх сурвалжуудын мэдэгдэл уг мэдээллийг няцааж байсан юм.
