АНУ-ын тагнуулын албанаас дэлхий даяар тархаад байгаа шинэ коронавирусийг хүн бүтээгээгүй гэсэн дүгнэлт гаргажээ.
Гэхдээ вирусийн гарал үүслийг шалгаж, амьтнаас хүнд халдсан, эсвэл Хятадын лабораториос гадагш алдагдсан эсэхийг тогтоохоор үргэлжлүүлэн ажиллаж байгаагаа мэдэгдсэн байна. Дүгнэлтийг АНУ-ын тагнуулын байгууллагуудын мэдээллийг нэгтгэдэг Үндэсний Тагнуулын Удирдах Газраас гаргажээ.
Сүүлийн үед АНУ-ын ерөнхийлөгч Дональд Трампын засаг захиргаа коронавирусийн цар тахлын гол бурууг Бээжингийн эрх баригчдад тохох болсон.
Д.Трамп саяхан ярихдаа "шинэ вирусийг Ухань хотын лабораториос алдагдсан гэдэгт итгэлтэй байгаа" гэдгээ илэрхийлсэн юм. АНУ-ын төрийн нарийн бичгийн дарга Майк Помпео саяхан гадаадын мэргэжилтнүүдийг Уханий лабораторид нэвтрүүлж, коронавирусийн гарал үүслийг судлуулахыг БНХАУ-ын талд уриалж байв.
Пүрэв гарагт БНХАУ-ын засгийн газраас гаргасан мэдэгдэлд шинэ коронавирус лабораториос алдагдсан гэх мэдээллийг ямар ч үндэслэлгүй, зохиомол зүйл гэж няцаасан юм. Өнгөрсөн оны сүүлээр төв БНХАУ-ын Ухань хотод тарж эхэлсэн шинэ коронавирусийн халдвараар өнөөдөр дэлхий даяар нийт 3.1 сая хүн өвчилж, 220,000 гаруй хүн нас бараад байна.
Intelligence Community Statement on Origins of COVID-19 pic.twitter.com/MIPr6LVzU4
— Office of the DNI (@ODNIgov) April 30, 2020
