Дорнод аймаг, Сүхбаатар аймагт өчигдөр буюу дөрөвдүгээр сарын 18-нд нийт дөрвөн удаагийн хээрийн түймэр бүртгэгдсэнээс гурвыг нь бүрэн унтрааж, нэг түймрийг цурамд оруулсан байна.
Тодруулбал, Дорнод аймгийн Чойбалсан сумын Энгэршанд багийн “Минчүүрийн уурхай” гэх газарт 04 дүгээр сарын 18-ны 10:25 цагт гарсан хээрийн түймрийг 17:45 цагт цурамд оруулж, 20:00 цагт бүрэн унтраажээ. Мөн Сүхбаатар аймгийн Эрдэнэцагаан сумын Билүүт багийн “Билүүт” гэх газарт 23:40 цагт гарсан түймрийг 00:36 цагт цурамд оруулж, өнөөдөр (2026.04.19) 08:00 цагт бүрэн унтраасан байна. Түүнчлэн Дорнод аймгийн Халхгол сумын Ташгай багийн “Арц холбоо уул” орчимд БНХАУ-аас хил дамнан орж ирсэн хээрийн түймрийг өнөөдөр 02:21 цагт цурамд оруулж, 09:06 цагт бүрэн унтраажээ. Харин Сүхбаатар аймгийн Сүхбаатар сумын IV багийн “Билүүт” гэх газарт 04 дүгээр сарын 18-ны 16:55 цагт гарсан түймрийг 20:02 цагт цурамд оруулсан бөгөөд бүрэн унтраахаар холбогдох алба хаагчид үргэлжлүүлэн ажиллаж байгаа тухай мэдээллээ.
