Америкийн коллежийн сагсан бөмбөгийн дээд түвшин болох NCAA-д амжилттай тоглож буй Монголын тамирчин Майк Ш.Энхийн-Од төгсөх ангийн шилдэг тоглогчдын оролцдог “Бүх оддын тоглолт”-д уригдан оролцохоор болжээ.
Тус тоглолтыг Үндэсний дасгалжуулагчдын холбоо (NABC)-ноос жил бүр зохион байгуулдаг бөгөөд улирлын оргил үе болох NCAA Final Four-ийн үеэр уламжлал болгон явуулдаг онцгой арга хэмжээ юм. “Бүх оддын тоглолт” нь мэргэжлийн сагсан бөмбөг рүү дэвших шатанд буй тоглогчдод өөрсдийгөө харуулах чухал боломж болдог. Ялангуяа NBA-ийн багуудын скаутууд энэхүү тоглолтыг өргөнөөр үзэж, ирээдүйн тоглогчдыг сонгон анзаардаг уламжлалтай. Өмнөх жилүүдэд оролцсон олон тамирчин NBA-д амжилттай карьераа эхлүүлсэн байдаг. Майк Ш.Энхийн-Од энэхүү тоглолтод оролцох болсон нь Монголын сагсан бөмбөгийн түүхэнд онцлох үйл явдал болж байна. Түүний хувьд олон улсын тавцанд өөрийгөө батлах, мэргэжлийн лигүүдийн анхааралд өртөх том боломж нээгдэж байна.
