АНУ-ын Ерөнхийлөгч Д.Трамп өчигдөр /2025.11.29/ олон нийтийн сүлжээнд, "Бүх агаарын тээврийн компаниуд, нисгэгчид, хар тамхины наймаачид, хүний наймаачидаа Венесуэлийн нутаг дэвсгэр болон түүний эргэн тойрон дахь агаарын орон зайг бүрэн хаасан. Анхаарал тавьсанд баярлалаа" гэж мэдэгдсэн юм.
To all Airlines, Pilots, Drug Dealers, and Human Traffickers, please consider THE AIRSPACE ABOVE AND SURROUNDING VENEZUELA TO BE CLOSED IN ITS ENTIRETY. Thank you for your attention to this matter! PRESIDENT DONALD J. TRUMP
— Donald J. Trump (@realDonaldTrump) November 29, 2025
Тэгвэл АНУ-ын Ерөнхийлөгчийн энэхүү мэдэгдлийн дараа Венесуэлийн тал "колоничлолын аюул" хэмээн Д.Трампыг буруутгасан байна. Тодруулбал, тус улсын Гадаад хэргийн яам Д.Трампын мэдэгдлийг “Венесуэлийн ард түмний эсрэг хийгдсэн хэтрүүлэгтэй, хууль бус, үндэслэлгүй түрэмгийлэл” хэмээн тодорхойлсон байна. АНУ бусад орны агаарын орон зайг хаах эрхгүй боловч Д.Трампын олон нийтийн сүлжээнд хийсэн мэдэгдэл нь агаарын тээврийн компаниудад тодорхойгүй нөхцөл байдал үүсгэж, Венесуэл рүү нислэг үйлдэхээс зайлсхийхэд хүргэж байж болзошгүй байгаа аж.
Энэ долоо хоногт Венесуэл улс Iberia, TAP Portugal, Gol, Latam, Avianca, Turkish Airlines зэрэг зургаан томоохон олон улсын агаарын тээврийн компанийг нислэгээ үргэлжлүүлэх тухай шаардлагыг биелүүлээгүй хэмээн үзэж, тэднийг Венесуэлд буухыг хоригложээ.
Тэгвэл АНУ Карибын тэнгист цэргийн хүчээ нэмэгдүүлж байгаа бөгөөд энэ ажиллагааг хар тамхины наймаатай тэмцэх зорилготой гэж мэдэгдсэн юм. Харин Венесуэлийн дарангуйлагч Николас Мадуро АНУ-ын зүгээс дэвшүүлсэн хар тамхины наймааны тухай мэдэгдлийг улс төрийн зорилготой, өөрийг нь түлхэн унагах оролдлого хэмээн буруутгаж байгаа юм.
АНУ Венесуэлийн ойролцоо дэлхийн хамгийн том нисэх онгоц тээгч USS Gerald Ford болон 15 мянга орчим цэргийг байрлуулаад байгаа нь 1989 онд Панам руу довтлосноос хойших бүс нутагт хийсэн хамгийн том цэргийн байршуулалт болж байгааг шинжээчид онцолж байна. АНУ үүнийг хар тамхины наймааны эсрэг ажиллагаа хэмээн тодорхойлж байгаа юм.
Пүрэв гараг /2025.11.27/-т Д.Трамп хийсэн мэдэгдэлдээ, "Венесуэлийн хууриа газраар дамжуулж байгаа хар тамхины наймааг зогсоох АНУ-ын хүчин чармайлтын “маш удахгүй” эхлэх"-ийг анхааруулсан юм. Харин Венесуэлийн тал АНУ-ын эдгээр ажиллагааг Н.Мадурог огцруулах оролдлогын нэг хэсэг хэмээн тайлбарлаж байгаа юм.
Өмнө нь АНУ Венесуэлийн дээд түвшний цэргийн албан тушаалтнуудыг "хар тамхины картел" буюу мансууруулах бодисын хууль бус бүлэглэлийг удирддаг гэж үзэн, тэднийг гадаадын террорист байгууллагаар зарласан. Харин Венесуэлийн засгийн газар энэ нэршлийг “худал, санаатайгаар гүтгэсэн” хэмээн эрс эсэргүүцсэн бөгөөд дотоод хэргийн сайд Диосдадо Кабелло уг картелийг “зохиомол бүтээгдсэн ойлголт” гэж мэдэгдсэн юм. Харин АНУ-ын Төрийн департамент "хар тамхины картел" нь Венесуэлийн цэрэг, тагнуул, хууль тогтоох болон шүүхийн байгууллагыг ч завхруулсан гэж мэдэгдсэн юм.
Эх сурвалж: BBC
