Украины Ерөнхийлөгч В.Зеленскийн Тамгын газрын дарга Андрей Ермакын гэрт нь хийсэн авлигын эсрэг нэгжлэгийн дараа тэрээр албан тушаалаасаа огцорч байгаагаа мэдэгдсэн байна. А.Ермак нь Оросын дайны турш В.Зеленскийн хамгийн ойрын зөвлөхийн нэг байсан ч түүнийг гэрт нь хийсэн мөрдөн шалгах ажиллагааны дараа ажлаа өгсөн байна.
Авлигатай тэмцэх агентлагууд А.Ермакын Киев хот дахь орон сууцанд нэгжлэг хийсэн ч, түүнийг албан ёсоор гэм буруутай гэдгийг нь тогтоогоогүй байна. Энэ талаар В.Зеленский хэлэхдээ "Украинаас АНУ-тай хийх энхийн хэлэлцээрийн чухал үед дотоод тогтвортой байдал шаардлагатай" гэж онцолсон. Харин Украины Ерөнхийлөгчийн Тамгын газрын дарга А.Ермакын огцролт нь Д.Трампын шинэ энхийн санаачилгатай холбоотой өндөр түвшний хэлэлцээний өмнө тохиож байгаа бөгөөд энэ долоо хоногт АНУ болон Оросын төлөөлөгчид тус тус Киев, Москвад айлчлах төлөвтэй байгаа юм. Сонирхуулахад, Украинд эрчим хүчний салбартай холбоотой томоохон авлигын хэрэг шалгагдаж эхэлсэн нь тус улсын засгийн газрын нэр хүндийг сүүлийн долоо хоногт эрс дордуулаад байгаа юм.
Эх сурвалж: BBC
