“ETV” телевизийн бэлтгэн гаргадаг “Хотын бүсгүй хөдөө нутагт” нэвтрүүлгийн энэ долоо хоногийн дугаар олон нийтийн анхаарлыг татаж, гол дүрийн залуус болох Г.Ганхүрэл, Н.Нандинцэцэг нар бусдын хайрыг татжээ. Иймд бид уг нэвтрүүлгийн эмэгтэй оролцогч Н.Нандинцэцэгтэй ярилцлаа.
ВИДЕО:
-Ямар мэргэжлээр хаана сурдаг вэ. Өөрийгөө манай үзэгчдэд товч танилцуулахгүй юу. Анх энэ нэвтрүүлэгт орох шийдвэрийг хэрхэн гаргав?
-“Хотын бүсгүй хөдөө нутагт” нэвтрүүлгийн оролцогч Н.Нандинцэцэг байна. Шихихутуг их сургуулийн эрх зүйч мэргэжлийн 4-р курсын оюутан. Энэ нэвтрүүлгийг манай гэр бүлийнхэн их үздэг байсан. Дүү маань намайг анкетаа явуулчих гэж олон удаа ятгасны эцэст би анкетаа явуулаад, ETV-ээс холбогдсон.
-Нөгөө залуугийнхаа талаар очихоосоо өмнө ямар төсөөлөлтэй байв?
-Бартаатай замыг туулж энэ нэвтрүүлэгт орсон. Тухайн үед мэргэжлийн дадлага хийж байсан учраас ачааалал ихтэй байсан үе л дээ. Нэвтрүүлгийн хамт олон надтай холбогдоод, заавал оролц гэж хэлсэн. Тэгээд л долоо хоногийн турш бараг өдөр бүр хоёр цаг ч юм уу унтаж байгаад энэ нэвтрүүлэгт орсон доо. Очихоосоо өмнө цасан шуурганаас болоод Баянхонгорт нэг хоноод цааш явсан. Ийм олон бартааг туулж залуутайгаа уулзсан. Залуу маань ч яг л миний сонирхлын залуу байсан даа.
-Гэр бүлийнхэн нь өөрийг чинь хэрхэн хүлээж авсан бэ?
-Аав ээж гэрийнхэн нь үнэхээр найрсаг юм билээ. Монгол нүүдэлчин аж аухй маань ер нь ямар ч хүнийг найрсагаар угтаж авдаг заншилтай шүү дээ. Намайг очиход бүгдээрээ гарч ирээд “сайн явж ирсэн үү” гээд найрсагаар хүлээж авсан.
-Аав, ээж нь энэ нэвтрүүлэгт орно гэхэд хэрхэн хүлээж авсан бол. Явахаас чинь өмнө юу гэж захиж байсан бэ?
-Нэвтрүүлэгт орох санал ирээд хамгийн түрүүнд аав, ээждээ хэлсэн. Гэхдээ энэ нэвтрүүлгийг их үздэг, дэмждэг байсан учраас охин нь орно гэхээр дуртай л байсан байх.
-Одоо Г.Ганхүрэл та хоёр холбоотой байгаа юу?
-Холбоо харилцаатай байгаа. Гэхдээ одоо байгаа газар нь сүлжээгүй учраас байнга яриад байдаггүй. Ажлуудаа амжуулчхаад л уулан дээр гарч ирж надтай ярьдаг даа.
-Залуу нь өөрт тань ямар сэтгэгдэл төрүүлэв? Анх хэрхэн төсөөлж байсан бэ?
-Ер нь их сэтгэлтэй залуу байсан. Бас хамт байхад түшиг, тулгууртай, дандаа намайг эрхлүүлдэг. Түүнийх нь хэрээр би ч эрхлүүлэхийг хичээж байсан. Тийм болохоор илүү тухтай, биеэ барих асуудал байгаагүй. Нэвтрүүлэгт орохоо мэдчихээд хэд хоногийн өмнөөс л догдолж байсан шүү дээ. Хөдөөгийн залуу гэхээр надаас ах байх гэж бодож байсан чинь надтай чацуу болохоор нь их баярласан. Бас залуу маань хүндэт харуулын албыг хаагаад ирчихсэн мундаг залуу. Би ч хөдөөгийн залуусыг бүрэг, үг дуу цөөтэй гэж боддог байтал эсрэгээрээ нээлттэй, их яриа залуу байсан. Их хөгжилтэй, жаахан юман дээр ч марзагнаад намайг байнга инээлгэдэг байсан нь гоё санагдсан.
-Та хоёр дараа хэзээ уулзах бол?
-Миний хонхны баяр хавар, тавдугаар сард болно. Би өөрөө ч ирэх байх гээд хүлээгээд найдаад л байж байна даа.
-Хотын залуу болон хөдөөгийн залуусын ялгаа байсан болов уу?
-Хотын залуус их яриа, нээлттэй байдаг даа. Г.Ганхүрэлийн хувьд ч их нээлттэй байсан болохоор нэг их ялгаатай санагдаагүй.
-Хэрвээ та хоёр болж бүтвэл өөрийн тань хувьд хөдөө очиж амьдарч чадах болов уу. Юу гэж бодож байна?
-Манай өвөө, эмээ хөдөө байдаг. Би ч хөдөө очих их дуртай байсан. Тийм болохоор хөдөөгийн амьдралыг хурдан сураад, дасан зохицох чадвартай байна байх гэж бодож байна. Г.Ганхүрэл хаана амьдарна түүнийг нь л дагах байх даа.
-Та хоёрын оролцсон нэвтрүүлэг маш олон хүнд хүрлээ. Өмнөх дугааруудаас юугаараа ялгаатай байсан бол?
-Ганхүрэл бид хоёр биентэйгээ илүү нээлттэй байсан учраас бас хэн хэн нь нэвтрүүлэгт оролцож байгаа болохоор ингээд хэлчихье, ингэж хэлж болохгүй гэж ерөөсөө бодоогүй. Зүгээр л хоёулхнаа байгаа юм шиг нэгэндээ л анхаарал хандуулаад ярьсан болохоор хүмүүст их хүрсэн байх гэж бодож байна.
-Хүмүүсийн хэлсэн эерэг, сөрөг сэтгэгдлүүд хэрхэн нөлөөлөв?
-Унтаад өглөө сэрэхээр л хүмүүс зөндөө гоё үг хэлчихсэн байдаг. Хамгийн гоё нь “хотын охин хэрнээ хүмүүжилтэй, хүнтэй зөв мэндлээд сурчихсан охин байна. Аав ээж нь охиноо сайн хүмүүжүүлжээ” гэсэн сэтгэгдэл байсан. Манай аав ээж хоёр намайг үнэхээр сайн хүмүүжүүлсэн гэж би дотроо боддог. Эцэг эх маань ч үнэхээр мундаг хүмүүс байдаг. Ээж маань надад хүнийг хайрлаж байж л хайрлуулдаг шүү гэж үргэлж хэлдэг. Яг л тийм байдлаар Г.Ганхүрэлтэй харьцсан даа.
-Г.Ганхүрэлийн аав, ээж болон таны өөрийн тань аав, ээж нэвтрүүлгийн дараа юу гэж хэлж байсан бол?
-Нэвтрүүлгийн маргааш нь Г.Ганхүрэлийн аав, ээж нь над руу яриад “Миний охин сайн явж очсон уу, ядарсан уу” гээд л намайг явахад “Миний охин сайн яваарай. Манай бэр болоорой” гэж хэлж байсан нь хамгийн гоё санагдсан. Харин манай аав ээж хоёр “ёстой хөөрхөн хүү байна. Ямар зөв яриатай юм бэ” гэж хэлсэн. Аав ээжид маань их л таалагдсан юм шиг байна лээ.
-Хөдөө нутагт эмэгтэйчүүд ховордож байна л даа. Холтын бүсгүйн нүдээр харахад тэнд амьдарвал ямар байна?
-Хөдөө эмэгтэй хүн их цөөхөн юм шиг ажиглагдсан. Сум, аймгийг нь хараад байхад нэг их эмэгтэй хүн харагдаагүй. Ихэнх нь хот газар бараадсан байх. Тийм болохоор хөдөө ийм гоё амьдрал байдаг шүү гэдгийг харуулах нь л энэ нэвтрүүлгийн гол санаа шүү дээ. Хөдөөгийн болзоо их гоё санагдсан. Анх удаа надад эрэгтэй хүн тийм сэтгэл гаргаад, гэнэтийн бэлэг барьсан нь их хөөрхөн байсан шүү. Их татагдсан. Ер хөдөөгийн болзоо хотын болзооноос илүү гоё байсан. Надад сумынхаа соёлын төвд гэнэтийн бэлэг барьсан. Соёлын төвийг нь харахад бүх юм байсан. Дуу бичдэг студи ч хүртэл байсан юм. Хөдөө орон нутагт хөгжил байхгүй гэж боддог юм шиг байна лээ. Гэхдээ хөдөө орон нутагт ч хичээх юм бол гоё амьдарч болно. Залуучууд хөдөө орон нутагт очиж байж л хөгжинө шүү дээ. Хот гэлтгүй хөдөө орон нутагт амьдрахыг зориорой гэж хэлмээр байна.
