Бүгд Найрамдах Турк Улсад төрийн айлчлал хийж байгаа Монгол Улсын Ерөнхийлөгч У.Хүрэлсүх өнөөдөр /2025.01.16/ “Ататуркийн бунхан цогцолбор”-т хүндэтгэл үзүүллээ.
Тэгвэл Аныткабир нь Туркийн хувьсгалын эцэг, БНТУ-ыг үндэслэгч Мустафа Кемал Ататуркийн бунхан байрлаж буй цогцолбор юм. Тус цогцолборын барилгын ажил 1944 онд эхэлж, 1953 онд ашиглалтад орсон. Нийт 750 мянган м2 талбайтай, далайн түвшнээс дээш 906 метрийн өндөрт оршдог. Тус цогцолбор нь Ататуркийн бунхан бүхий үндсэн барилга, музей, ёслолын талбай, Арслантай зам, тэдгээрийг хүрээлсэн энх тайвны цэцэрлэгээс бүрддэг байна.
Үндсэн барилгад Ататуркийн бунхнаас гадна Ататурк болон чөлөөлөх дайны музей, Ататуркийн номын сан байдаг бөгөөд түүний эдэлж хэрэглэж байсан зүйлс, чөлөөлөх дайны сэдэвтэй уран зургууд, сийлбэр бүтээлүүд, гэрэл зургуудыг дэлгэсэн. Барилгын гадна, дотор ханыг Туркийн газар нутагт амьдарч байсан Хитит, Эртний Грек, Сельчук, Османы үеийн мозайк, сийлбэр, уран зураг зэрэг олон төрлийн урлагийн бүтээлүүдээр чимэглэсэн байдаг аж.
Ёслолын талбайд Туркийн иргэд үндэсний баяр ёслолын өдрүүдээ тэмдэглэдэг уламжлалтай юм. Талбайн шалыг Туркийн уламжлалт хивсний урлагийн загвараар хийсэн бөгөөд талбайн хажууд 30 метрийн өндөрт Туркийн далбааг мандуулжээ.
Арслантай зам нь 262 метрийн урттай бөгөөд замын хажуугаар Турк үндэстний эв нэгдлийг бэлгэдсэн 24 чулуун арсланг байрлуулсан байна.
Энх тайвны цэцэрлэг нь 630 мянган м2 талбайтай, гадаадын зарим улс, Туркийн бусад хот, аймгаас цуглуулсан 104 төрлийн 50 мянган ширхэг мод, ургамлыг тарьж ургуулжээ. Туркийн төр, засгийн зүгээс албан ёсны айлчлал хийж буй гадаадын дээд, өндөр түвшний зочид төлөөлөгчид болон шинээр томилогдож ирсэн гадаад улсын Элчин сайд нараар тус цогцолборт цэцэг өргүүлж, хүндэтгэл үзүүлэх ёслолыг зохион байгуулдаг байна.
