Өнгөрсөн амралтын өдрүүдэд эхэлсэн жагсаалын үед гарсан хэрэг, зөрчлүүдэд ямар арга хэмжээ авсан талаар ЦЕГ-ын Хэвлэл мэдээллийн төвийн дарга, Дэд хурандаа Г.Пүрэвдэлгэр мэдээлэл хийлээ.
Тэрбээр "Энэ сарын 07-ны өдөр Эрх чөлөөний эвсэл намаас Сүхбаатар дүүргийн Засаг даргад мэдэгдэл хүргүүлж, жагсаал цуглаан зохион байгуулах талаараа мэдэгдсэн байна. Энэ дагуу жагсаал цуглааныг бүртгэж, улмаар нэгдүгээр сарын 11-ний өдрөөс Сүхбаатарын талбайд жагсаал цуглаан болж эхэлсэн. Үүнээс хойш жагсаал цуглаантай холбоотой гэмт хэрэг, зөрчлийн шинжтэй 13 дуудлага мэдээлэл цагдаагийн байгууллагад ирсэн.
Үүнээс гэмт хэргийн шинжтэй 7, зөрчилиййн 6 хэрэг бүртгэгдсэн. Тодруулбал иргэдийн эд хөрөнгийг эвдэж сүйдэлсэн, төрийн онцгой объект руу бие засах, нэвтрэх хориотой газар руу нэвтрэх гэж оролдох, цагдаагийн албан хаагчийн биед халдах, төрийн байгууллагын ажилтны савхан ясыг хугалсан, цагдааг шатнаас түлхэж унагаан гэмтээсэн зэрэг гэмт хэргийн шинжтэй хэргүүд гарсан ба холбогдогчийг шалгаж байна. Бага насны хүүхэдтэй эмэгтэйн тээврийн хэрэгслийг нь хаахад нь шаардлага тавихад түлхэж унагаасан зэрэг хэргүүдийг бүртгэж, зөрчлийн хэрэг нээн ажиллаж байна. Бага насны хүүхэдтэй, архи согтууруулах ундаа хэрэглэсэн, насанд хүрээгүй хүүхэд, ахмад настан, хөгжлийн бэрхшээлтэй зэрэг нийт 129 иргэнд холбогдох хууль журмын хүрээнд зөвлөгөө өгч, ар гэрт нь аюулгүй хүргэж өгсөн.
Жагсагчид зам хаасны улмаас Улаанбаатар хотын замын хөдөлгөөнд түгжрэл үүсэж, иргэдийн зорчих эрхийг зөрчсөн. Тэнд ямар ч шалтгаантай хүн явж байж болно. Хүнд өвчтэй, ахмад настан, хүүхэд нь өвдсөн гэх мэт иргэд, яаралтай түргэн тусламжийн машин ч зорчиж байсан. Тэгэхээр зам хааж жагсах нь хууль бус тул бусдын эрхийг хүндэтгэж үзэхийг хүсье. Учир нь эвлэлдэн нэгдэж тайван жагсах нь бусдын эрхийг зөрчих ёсгүй хэмээн хуульдаа заасан байдаг" гэлээ.
