Анхдугаар үндсэн хуулиа баталж, Бүгд найрамдах улсаа тунхагласны түүхт 100 жилийн ой, Орчин цагийн дипломат харилцаа үүсч хөгжсөний 113 жилийн ой, Үндэсний эрх чөлөө, тусгаар тогтнолоо сэргээн мандуулсны 113 жилийн ойг тохиолдуулан өнөөдөр /2024.12.27/ Гадаад харилцааны салбарт олон жил үр бүтээл, идэвх санаачлагатай ажиллаж, гадаад бодлогын зорилтуудыг хэрэгжүүлэхэд оруулсан хувь нэмрийг нь өндрөөр үнэлж, дараах нэр бүхий дипломатуудад “Онц бөгөөд бүрэн эрхт элчин сайд”, “Онц бөгөөд бүрэн эрхт элчин” цолыг тус тус хүртээлээ.
Тодруулбал, “Онц бөгөөд бүрэн эрхт элчин сайд цол”-ыг ахмад дипломатч Бямбадоржийн Гомбо, Ойдовын Нямдаваа, Цэдэндамбын Батбаяр нарт хүртээж, алтан гэрэгэ-ээр шагналаа. Харин ахмад дипломатч Дамдины Балжинням, Рагчаагийн Баасан, Цогтын Нямсүрэн, Гадаад харилцааны яамны тусгай үүрэг гүйцэтгэгч, элчин сайд Дамбын Ганбат, Гадаад харилцааны яамны бодлогын газрын зөвлөх Бархасын Дорж, Гадаад харилцааны яамны хөрш орнуудын газрын зөвлөх Очирбатын Очирмаа, Гадаад харилцааны яамны олон улсын худалдаа, эдийн засгийн газрын зөвлөх Воршиловын Энхболд нарт “Онц бөгөөд бүрэн эрхт элчин” цолыг хүртээж, мөнгөн гэрэгэ-ээр шагналаа.
